Mendizaleak aurki aurre piriniora abiatuko dira
Urdaburu Mendi Elkartak Hueskako hainbat gailurretara irteera antolatu du maiatzaren 13 eta 14ko astebururako. Izena eman daiteke dagoeneko.
Punta Carrero, Cerro de la Collada edo Peña del Sol bezalako gailurretatik igaroko dira. Honezkero, hainbatetan antolatu du Urdaburu Mendi Elkarteak aurre piriniora irteera. Aurten, bada, maiatzaren 13 (larunbata) eta 14ko (igandeko) asteburuan antolatuko dute txangoa. Autobusa maiatzaren 13an goizeko 07:00etan abiatuko da Alamedatik, eta ordu laurden beranduago igaroko da Aritzetatik.
Mendizaleak Sarsamarcuellotik (Hueska, Aragoi) abiatuko dira larunbatean, eta Peña del Sol (1286 m.), Punta Carrero (1374 m.), zein Don Hueso (1501 m.) gailurretatik igaroko dira. Horrela, Loarrera (Hueska, Aragoi) helduko dira, 15,5 kilometroko eta 900 metro igo beharreko ibilbidea osatu ondoren. Aipatu ibilbidea sei ordutan egitea aurreikusten dute. Behin Loarrera iritsita, mendizaleak autobusez Rigloseko aterpetxera mugituko dira eta bertan egingo dute lo.
Igande goizean, Loarrera itzuli eta bertatik bigarren ibilaldiari ekingo diote: Pusilibro mendira (1595 m.) igoko dira, eta ondoren Cerro de la Collada (1469 m.) kateatuko dute. Bertatik Rasal (Hueska, Aragoi) udalerrira jaitsiko dira. Bigarren egunean 15,5 kilometroko eta 1000 metro igo beharreko ibilbidea osatuko dute.
Antolatzaileek eguneko motxila eramatearekin nahikoa dela iragarri dute. Hain zuzen ere, Rigloseko aterpetxean pentsio erdian igaroko dute gaua; eta, beraz, afari nahiz gosaria jasoko dute. Dena den, lo zakua eramateko eskatu dute. Federatuek txartela eraman beharko dute ere. Irteerak hauentzat 70 euro balioko du, eta federatu gabekoentzat 75 euro. Izena emateko ohiko bideak erabiliko ditu elkarteak: astearte nahiz ostegunetan, egoitzan bertan 19:00ak eta 21:00ak artean, 943 527 879 telefonora dei eginda, edota ondorengo estekan galdetegia beteta.
Irteeraren ezaugarri eta datu tekniko guztiak ondorengo estekan topa daitezke.
