Maiatzaren 7an eta 21ean Etxera Egunak ospatuko ditu Sarek
Urrunketa bukatu bada ere, preso eta iheslariak etxean nahi dituztela aldarrikatuko dute. Horretarako, mendi ibilaldi bat eta bizikleta martxa bat antolatu dituzte.
‘Etxerako bidea gertu’ lemapean ekin zion Sare Herritarrak urteari, urtarrilaren 7an Bilboko kaleak betez. “Nahi baino beranduago” iritsi bada ere, “urrunketaren” bukaera iritsi dela txalotu du Sarek, eta hori “herriko kaleetan” egon direlako izan dela adierazi dute. Euren bidea, baina, bukatu ez dela esan dute, “preso eta iheslariak” eurekin nahi baitituzte, etxean nahi dituzte.
Dena den, etxerako bide hori “oztopatu” nahi duenik badagoela nabarmendu du Oiartzungo Sarek, eta horren adibide direla “gradu erregresioak”. Sareren esanetan, Espetxe zuzendaritzak eta Eusko Jaurlaritzak presoen gradu progresioan aurrera urratsak eman badituzte ere, horietako asko fiskaltzak “atzera bota” dituela salatu dute, eta Juan Manuel Intziarte oiartzuarraren kasua da horren adibide: “Lege arrunta jarraituta, otsailean jasandako iktusaren ondorioz, hirugarren gradua onartuta zion Martuteneko espetxe zuzendaritzak, baina fiskaltzak bere gradua errekurritu ondoren, berriz espetxera itzuli behar izan du”. Horren harira, hilaren 29an, 11:30ean, Donostiako Artzai Onean egingo den agerraldira bertaratzeko deia luzatu dute Sareko kideek.
“Salbuespen legediak” indarrean jarraitzen duen bitartean, presoek bizi duten “eskubide urraketa” salatzen jarraituko dutela ozen esan dute. Joanes Larretxearen kasua ere ekarri dute gogora. Sarek jakinarazi du, nahiz eta Larretxeak Frantzian sei urteko espetxealdia bete, Espainiar estatuak ez dituela “aintzat hartu” urte horiek, eta soilik Espainian betetako zazpi urteak kontabilizatzen dizkiotela baietsi dute. Legedi arrunta aplikatuz gero, Espainiako zazpi urteei Frantziako seiak gehitu behar zaizkiola argitu dute Sareko kideek, “guztira hamahiru urte batuz eta baimenekin etxean egoteko aukerak zabalduz”.
Bi adibide horien harira, bi aldarrikapen nagusi egin ditu Oiartzungo Sarek: gradu erregresioak eta salbuespen legedia gaitzetsi dituzte. Horregatik, bi Etxera Egun antolatuko dituzte maiatzean, 7an eta 21ean.
Maiatzak 7: Elorrietako tontorrera ibilaldia
10:00etan Iturriotz eta Karrikatik abiatuko dira parte hartzaileak. Iturriozko taldeak ‘Gradu erregresiorik ez’ lemapean ekingo dio ibilaldiari; eta Karrikatik abiatzen direnek, aldiz, ‘Salbuespen legediari ez’ aldarrikatuko dute. Bi auzoetatik abiatutako herritarrak Sorondon bilduko dira 11:30ean, eta azken zatia elkarrekin egingo dute, Elorrietako tontorrean ekitaldia egiteko.
Maiatzak 21: Bizikleta martxa herrikoia
Parte hartzaileak 11:00etan bilduko dira Gurutzeko plazan. Bertan bizikletak antolatu eta auzoz auzo joango dira egunari hasiera emateko. 13:00ak aldera, egunari bukaera emango diote herriko plazan.
“Bidea bukatu ez delako eta etxean nahi ditugulako” herritarrei bi Etxera Egunetan parte hartzeko deia luzatu diete antolatzaileek: “Heldu, gazte, familia zein lagun. Pausoz pauso eta pedalkadaz pedalkada aurrera baikoaz, ekar ditzagun etxera!”.