[Galeria eta bideoa] Oreretako XXXV. Sagardo Eguna aurkeztu dute
Sagardoaren festak Errenteria-Oreretako kaleak hartuko ditu hilaren 29an. Foru plazan egingo da eguneko lehen txotxa, 12:00etan.
Sagardoaren festak Errenteria-Oreretako kaleak hartuko ditu datorren larunbatean, hilak 29, eta gaur goizean aurkeztu dute Arramendiko magalean herrian tipikoa den egun handia. Oreretako Sagardo Egunaren XXXV. ekitaldia izango da aurtengoa, eta herritarrei kaleak eta plazak betetzeko deia luzatu diete, “euskal giroaz eta sagardoaz” lagunekin eta hurbilenekoekin gozatzeko.
Sagardoaren baitan antolatzen den “egun zorgarria” antolatzeko bidea “neketsua eta trabaz” betea izan bada ere, antolakuntza taldeko kideek azaldu dute lortu dutela eguna ospatzea, eta jaso duten norbanako eta eragileei esker on hitzak helarazi dizkiete.
Ohikoa den bezala, Sagardo Eguna 12:00etan hasiko da Foru plazan egingo den lehen txotxarekin. Bitarte horretan, dultzaineroek, trikitilariek, txistulariek, dantzariek, txalapartariek edota bertsolariek herriko kaleak girotuko dituzte.
Arratsaldeko txotxa, aldiz, 18:00etan izango da Zumardian, eta hainbat sagardogileren azken urteko uzta dastatu ahal izango da bertan. Eusko Labelen eskutik, txahala erreko da, eta hura dastatzeko aukera izango da. Ataungo talogileak ere presente egongo dira Sagardo Egunean, eta kale animazioak etenik izango ez duela iragarri dute.
Sagardoa dastatzeko, edalontzia hartzeko aukera egongo dela oroitu dute antolatzaileek. Edalontziarekin batera, pintxoa, zapia eta sagardotegi batean bazkaltzeko zozketa zenbakia eskuratuko dituzte sagardoaz gozatzera bertaratzen direnek. Zapiari dagokionez, aurreko urteren batekoa berrerabiltzeko deia luzatu dute antolakuntzako kideek.
Omenduak
Urtero bezala, Sagardo Egunaren alde lan egiten duten pertsonak omendu dituzte, haien “lan nekaezina” goraipatzeko. Aurten bi pertsonaren jarduna errekonozitu dute, Juanfer eta Idoia Arbelaitzena, eta haien lana “ezinbestekoa” izan dela nabarmendu dute. Emaitz Muruak bertso bana eskaini die omenduei, baita Sagardo Egunaren antolaketan lanean gogor ari diren kideei ere. Txotxa eginda, bi omenduek sagarrondoa landatu dute Arramendiko magalean, eta hurrengo batean sagasti “eder” horren “uzta bikaina” jasoko dutela zehaztu dute.
Sagardotegi hauen sagardoak dastatu ahal izango dira larunbatean: Alorrenea, Petritegi, Oyarbide, Irigoien, Bereziartua, Eula, Larre-Gain, Goiko Lastola, Otegi, Otsu-Enea, Astiazaran Iruin, Urdaira, Aialde Berri, Gaztañaga, Añota, Aguzkitza, Izeta, Ordo-Zelai, Egi Luze, Eluxeta, Aizkorreta, Donosti, Egiluze Alde, Llindduren Borda, Cidrerie, Toki Alai, Mizpiradi, Aizko eta Mele, Lau Haizetara, Eroski, Altzueta Carrefour, Oiartzungo sagardoa, Super Amara Saizar, Super Amara Zelaia, Lezoko sagardoa, Etxeberria, Olaizola eta Oialume.