Donipari eta Antxo AF, bat gora eta bestea behera
Euskal Ligatik Estatuko Hirugarren Mailara igo dira arrosak. Bertan buruz buru arituko dira antxotarren kontra, horiek Bigarren B-tik jaitsi baitira.
Donipariko jokalari eta zaleak, larunbateko garaipena eta igoera ospatzen. 
8-4 irabazi zion etxean, joan den larunbatean, Doniparik Beti Araba taldeari. Euskal Ligan aurten lehiatu dituzten 24 partidatik 20 irabazi dituzte, baina azken hau ez da gainontzekoak bezalakoa izan, igoerarako zuzeneko txartela eman baitie arrosei.
Sasoia bukatzeko lau jardunaldi besterik falta ez diren honetan, Euskal Ligako gorenean egonkortuta da Donibaneko areto futboleko taldea. Bi puntuko abantaila dute Albardero Rivabellosa bigarren taldearekiko, eta seikoa hirugarren doan Usansolorekiko.
Hiru urtetan hiru koska gora egin dute arrosek. 2023-2024 sasoian Euskal Liga atzean utzi eta Estatuko Hirugarren Mailan arituko dira, bolada on bezain luzea mantentzeko ahaleginetan.
Antxo AF
Estatuko Hirugarren Maila batzuentzat zorioneko eta besteentzat zorigaiztoko kategoria izango da. Izan ere, Donibaneko jokalariak buruz buru arituko baitira bertan datorren denboraldian Antxo AFren lehen taldearen kontra. Azken horiek Estatuko Bigarren B Mailatik jaitsiko dira.
Iaz igo ziren zuri-gorriak kategoriaz, eta gogorra izan zaie mailara egokitzea. Zuten onena eman badute ere, sailkapeneko hamaseitik hamaseigarren da gaur-gaurkoz Pescados Ferreresena. Bi partida besterik ez zaizkie gelditzen; azkena jokatzean, maiatzeko lehen asteburuan, ekidin ezineko patua egi bihurtuko da: Bigarren B Mailatik Estatuko Hirugarren Mailara jaitsiko dira.
Antxoko klubekoek, dena den, badute zerekin mantendu itxaropena. Bigarren taldea Gipuzkoako Bigarren Mailako bigarren postuan dago egun, lehen doan Lauburu Ibarratik hamar puntura. Igoerarako sistema lauko play-off bidez arautuko dute aurten ere; alegia, lehen sailkatuak laugarrenaren kontra jokatuko ditu joan-etorriko partidak, eta berdina bigarren eta hirugarren taldeen artean.
Kanporaketa horiek eramaten dituzten biak izango dira hurrengo denboraldian Gipuzkoako Lehen Mailan arituko direnak. Txartel horietako bat Antxo AF ‘B’-k lortuko balu, elkarren segidako bigarren igoera litzateke talde horrena, iaz ere kategoria bat gora egin baitzuten.
