EAJren zerrenda, "pasaitar euskaldunen belaunaldi berri bat"
Loreto Osa, Enara Mecerreyes eta Koldo Errondosoro dira hiru lehenak. Pasaia "berdinzaleago eta euskaldunago" bat nahi dute.
Zerrendako lehen jeltzaleen argazkia. 
Loreto Osa Ocon Pasaiako alkategai jeltzaleak atzo eguerdian aurkeztu zuen Pasaiako EAJk herritarren gehiengoaren babesa lortzeko osatu duen zerrenda. “Gure herria maite dugun pasaitar euskaldunen belaunaldi berri bat gara, eta bertako bizilagunen alde eta haientzat lan egiteko konpromisoa hartu dugu”, adierazi zuen San Pedroko Lonjako plaza berrian egindako ekitaldian.
Osak ziurtatu zuen alkatetzara lehen aldiz gogotsu, indarrez eta ilusioz aurkezteko erronka hartu duela. Pasaiako Udalean hainbat urtez “bete gabeko promesak” egin izan direla uste du zerrendaburuak, eta sinetsita esan zuen azken urteotan EAJren udal gobernuaren (PSE-EErekin) kudeaketa “fruituak ematen” hasi dela: “Izan ere, jeltzaleek sustatutako erakundeen arteko lankidetzari esker, hainbeste desiratutako biziberritzeari ekin ahal izan zaio, 162 milioi euro baino gehiagorekin”.
Datorren legegintzaldian agintea eskuratzekotan, alderdiaren lehentasuna Pasaia “berdinzaleago eta euskaldunago” baten alde lan egitea izango da. Zaintzaz ere mintzatu zen Osa: “Azken urteetan EAJk udaletik abiatu duen zaintza eredu berriari garrantzia emateko. Harro egon behar gara aitzindariak garelako gizarte politiketan eta bide horretan sakontzeko konpromisoa hartzen dugu”.
Hori guzti hori lortzeko, beste hemeretzi jeltzale izango ditu Osak alboan. Izen berriak batzuk, eta Pasaiako alderdian ibilbide luzea egin dutenak besteak. Zerrendaburuaren arabera, herriko lau barrutietako hogei gizon eta emakume dira, “bertan jaio eta bizi dira gehienak eta ondorioz, ondo ezagutzen dute herria eta ederki dakite zein diren bizilagunen beharrak eta nahiak”. Horra hor:
1. Loreto Osa
2. Enara Mecerreyes
3. Koldo Errondosoro
4. Aitor Intxausti
5. Nahikari Otermin
6. Oihana Gay
7. Yago Martinez
8. Arantxa Larrea
9. Urko Iturbe
10. Josu Urtizberea
11. Jorge Lizarreta
12. Belen Prieto
13. Urko Bidegain
14. Miriam Cano
15. Jon Samaniego
16. Isabel Arrillaga
17. Jaime Tejedor
18. Sergio Ekiza
19. Elene Arrazola
20. Jon Ander Eceiza
