Ereintzako emakumeak, Euskadiko txapeldun
Pozik dira jokalariak, entrenatzaileak eta Ereintza elkartea osatzen dutenak, eta ez da gutxiagorako, lorpen itzela izan delako errenteriarrena. Jesus Romero entrenatzailearekin hitz egin du HITZAk une gozoaz, eta aurrerantzean dituzten erronken gainean galdetzeko. Izan ere, epe laburrean, mailaz igotzeko kanporaketa izango dute.
Ereintzako Senior Emakumeak. Argazkia: Ereintza Ereintzako Emakume Seniorren taldea Euskadiko txapeldun da. Pozik dira jokalariak, entrenatzaileak eta Ereintza elkartea osatzen dutenak, eta ez da gutxiagorako, lorpen itzela izan delako errenteriarrena. Jesus Romero entrenatzailearekin hitz egin du HITZAk une gozoaz, eta aurrerantzean dituzten erronken gainean galdetzeko. Izan ere, epe laburrean, mailaz igotzeko kanporaketa izango dute.
Hunkituta azaldu da Romero gidatzen duen taldeko emakumeen garaipenarekin. Duela hiru urte heldu ziren taldera entrenatzaile bera eta Urko Elustondo –bigarren entrenatzailea da–, eta ez zutela helmuga txapel hori lortzea aitortu du: “Ikaragarri pozik gaude lortutakoarekin. Duela hiru urte hartu genuen taldea ari garen bi entrenatzaileak eta delegatua epe erdiko proiektu batekin, hirugarren urtean lanaren uzta jaso dugu. Jokatzera atera garenean aurten, helburua ez zen txapeldun izatea, lehiatzera ateratzea baizik, eta goian egotea taulan. Aurrera egin ahala, gero eta gertuagoa ikusi dugu aukera hori, eta azkenean txapeldun izatea lortu dugu”.
Igoera fasea helduko da orain; maiatzaren 12, 13 eta 14an jokatuko da, eta ez dakite oraindik non jokatuko ote den: “Uste dut aste honetan jakingo dugula jada”. Romerok aitortu du Errenteria-Oreretan jokatzea eskatu duela Ereintzak, “uste dugu klubarentzat, emakumeentzat, emakumeen kirolarentzat zein zaleentzat garrantzia berebizikoa izango duela. Urte asko dira Errenterian ez dela emakumeen igoera fase bat jokatzen, eta gizonetan hamabi urte pasa dira jada jokatu zenetik igoera. Oarsoaldeko emakumeen kirolarentzat oso positiboa izan daitekeen zalantzarik ez dugu igoera fase hori hemen jokatzea”.
Horren harira, jokalari gazteenak hartu ditu aintzat, “haientzat oso garrantzitsua da , haur eta kadeteentzat oso garrantzitsua da ikustea badutela talde bat eskura, gertu”.
Igoera fasera begira zein aukera ikusten dituzten galdetuta, zintzo erantzun du Romerok, “orain arte bezala, gure helburua lehiatzera ateratzea izango da. Ez dugu helburua mailaz igotzea, lehiatzea baizik orain arte egin dugun bezala, eta horrekin igoera lortzen badugu, ongietorria”. Lehia horretan arerio izan ditzaketen taldeei begira ere mintzatu da entrenatzailea, “oraindik ez dakigu zein izango diren, baina momentuz ez gara beldur ikusi dugunarekin. Uste dut lehiatzea dugula”, maila berean dauden zalantzarik ez du. Berriro esan du Ereintzakoen entrenatzaileak, “helburua gozatzea da, eta lortzen badugu, azkenean, igoera fasea Errenteriara ekartzea ikusleek goza dezatela eskubaloiaz oso intentsuak izango diren hiru egun horiekin gure taldearekin. Igoera lortzen badugu, primeran, baina ez badugu lortzen ere. Gure aldetik gure esku dagoen guztia jarriko dugu partida bakoitzean, baina gure helburua lortuta dugu jada”.
Mezu argia, Romerorena, helburua orain gozatzea eta lehiatzea dute Ereintzako emakumeek.
Igoera lortuko balute, Ereintzakoak Emakumezkoen Zilarrezko Ohorezko Mailan arituko lirateke.
Esker ona
Eskerrak eman dizkie Romerok bide honetan laguntza eskaini dieten guztiei, baita zaleei ere. Hunkituta erakutsi die esker ona entrenatzaileak, “asko kostatu zaigu hona iristea. Taldea hartu genuenean, zazpi jokalarik utzi zuten taldea lan kontuengatik bateragarria ez zutelako, taldea berritu behar izan genuen, beraz, eta oso jende gaztea dugu oraintxe. Gauza asko uzten dituzte bidean eskubaloian aritzeko eta hunkigarria da lorpena”.
Herritarren babesa ere eskatu du, “igoera fasea herrian jokatzea lortzen badugu, herritarrak deitu nahiko nituzke parte hartzera. Lanean jo eta su ari den lantalde bat ikusiko dute emaitza garrantzitsuak lortzeko.
Herriko beste kirol talde batzuk dagoeneko zoriondu dituzte ereintza elkarteko emakumeak. Hala egin dute Hibaika Arraun Elkarteak, baita Touring Futbol taldeak ere.
Zorionak @ereintzaEB!!!! pic.twitter.com/1QQzee4L9r
— HIBAIKA ARRAUN ELKARTEA (@Hibaika) April 23, 2023
