[Galeria] Xoxolurrekin, mendia, liburuak eta gatza
Leintz-Gatzaga aldera egindako irteeran 36 kidek parte hartu zuten. Hurrengoa maiatzaren 21ean izango dute.
Xoxolur Mendi Klubak sasoiko zazpigarren txangoa egin zuen igandean, Leintz-Gatzaga aldera. 36 izan ziren eguna Lezotik kanpo, Gipuzkoako zonalde hori ezagutzen pasa zutenak. “Giro ezin hobea izan zen”, azaldu dute mendizaleek.
Lehenik, Leintz-Gatzagara iritsi, eta Aitzorrotz mendia (736 metro) igo zuten; han, mendiari izena ematen dion haitz zorrotza ikusteko (baten batek ukitu ere egin zuen, ziur) parada izan zuten, baita inguruan dagoen XVI. mendeko ermita ere. Gainetik ez oso urruti dagoen Goi Erdi Aroko gazteluaren aztarnak ezagutzeko aukera izan zuten aldi berean lezoarrak, Nafarroako Erresumaren babeserako gune izan zena garai batean. Handik Eskoriatza aldera jaitsi, eta herriz aldatu zuten Leintz-Gatzagara berriz ere itzultzeko.
Hango pilotalekuan bazkaldu zuten. Ondoren, jolas librerako tartea hartu zuten Xoxolurrekoek, eta izan ziren bertako rokodromoan gora egiteko ausardia izan zutenak ere. Igandea Liburuaren Nazioarteko Eguna izanik, liburuak eraman zituzten partaideek trukea egiteko: nork bere liburua zergatik eraman zuen azaldu zuen, eta nahi zuenak, hori hartzeko aukera izan zuen. Gainera, Hilabetean Behin Xoxolur jolasari ere eutsi zioten, eta horren bi irabazleek Leintz-Gatzagako Dorletako gatz poltsa bana irabazi zuten.
Beraz, igandean, mendia, liburuak eta gatza Xoxolurren irteeran. Hurrengoa maiatzaren 21ean egitekoak dira, Zumaia-Deba arteko bidea irensteko. Mendia izango dute eta gatza ere bai, itsasokoa: euren asmoa da, “zorte on pixka batekin”, hango hondartzaren batean bainua hartzea. Askorentzat urteko lehena izango da, Xoxolurri esker.
Jarraian, Lezoko mendizaleek HITZAra bidalitako argazkien sorta:
