EH Bilduk entzute ariketa egin du Aztiko eta portuko langileekin
Babes publikoa adierazi dio koalizio subiranistak itsas zentro teknologikoari, eta portuko langileen protestekin ere bat egin dute.
EH Bilduko kideak Azti zentro teknologikoan. 
Teo Alberro Pasaiako EH Bilduren alkategaia, beste hainbat bilkidez inguratuta, Azti Itsas Zentro Teknologikoan izan zen atzo, alderdia badiako eragileekin egiten ari den entzute saiakeraren kariaz. Aztiren proiektuak “lehen eskutik” ezagutu zituztela ziurtatu dute.
Aztiko zuzendari nagusi Rogelio Pozo eta arrantza eta ozeano jasangarrien merkatu zuzendari Marina Santurtunekin elkartu ziren EH Bildukoak. Alberroz gain, Maddalen Iriarte Gipuzkoako EH Bilduren ahaldungaia, Juan Karlos Izagirre Donostiako alkategaia, Aizpea Otaegi Errenteria-Oreretako alkategaia, eta Mikel Arruti Lezoko alkategaia ere izan ziren bertan.
Oarsoaldean itsasoarekin zerikusia duten jarduera berriei eta ekonomia urdineko iniziatibei buruz aritu ziren bi aldeak. “EH Bilduk argi du Oarsoaldeko lau udalerriek 2016-2025 aldirako adostasunez landutako Plan Estrategikoa sustatzeko Eusko Jaurlaritzak Berpiztu programaren bidez bideratutako 24 milioiak hasiera besterik ezin dutela izan”, egin dute zentro teknologikoaren alde.
Portuko langileak
Pasaiara egindako bisita probestu zuten atzo ordezkariek Pasaiako Portu Agintaritzako langileen ordezkariekin biltzeko. Hilabeteak daramatzate langileek protestan, eta azken pausoa Eusko Legebiltzarrera jotzea izan zuten. 1.600 dira egun portu inguruan lan egiten duten herritarrak, eta euren alde egin nahi du talde subiranistak: “Baldintzak hobetzea, pribatizazioa etetea zein jarduera berriak sortzea da helburua”.
Hartu-eman horietatik abiatuta zein neurri proposatuko dituzten berandu baino lehen iragarriko du EH Bilduk, Etorkizuneko Badia programaren aurkezpenean. “Herritar guztiak, enplegua eta ingurumena kontuan hartuko dituen badia eraikitzeko proposamena, portuaren eta herritarren arteko elkarbizitza zein berrikuntza ardatz izango dituena”.
