Alderdi eta sindikatuen negoziazio mahai bat eskatuko dute
Pasaiako Udaleko Langile Batzordeak mozio bat erregistratuko du hurrengo plenorako. Hiru eskaera jaso dituzte; tartean, negoziazio bilerak.
Gaur, sinadurak erregistratu ondoren, egindako elkarretaratzeko argazkia. 
Martxoko udal plenoan hitza hartu zuen Aitor Oteiza Pasaiako Udaleko Langile Batzordeko (PULB) presidenteak. Orduko horretan funtzionarioen lanpostuen balorazio berria enkarga zezatela eskatu zieten udalbatzako kideei, Pasaiako langileen soldatak inguruko udaletakoekin pareka zitezen.
Urrats bat aurrera eman dute gaur PULBkoek, izan ere, elkarretaratzea egin baitute hurrengo udalbatzarrean aurkeztuko duten mozioa babesteko. 45 langile bildu dira gaur, udaletxe parean, erregistratu dituzten 189 sinaduren ordezkari gisa. Agerraldia probestu dute gainontzeko langileei dei egiteko maiatzaren 4ean (osteguna) 18:00etan izango den osoko bilkurara hurbiltzeko.
Aurreko agerraldian salatu zuten azken ordainsarien balorazioa ICSA Taldeak egin zuela 1987an, eta 36 urte igaro direla ordutik. Hori gutxi ez, eta gaitzetsi dute Pasaiako Udalak, hainbat epairen ondorioz, erretiro aurreratuaren primak kendu dituela. Prima horiek ahalbidetzen zuten langileek erretiroa legeak ezarritako adina baino lehenago hartzea eta, ondorioz, administrazioan langile gazteagoak sartu ahal izatea euren postuak betetzera.
Horiek horrela, PULBak honako puntuak onartzeko eskaera egingo die Pasaian ordezkaritza duten alderdiei:
- Alderdiek sindikatuekin negoziazio mahai bat eratzeko konpromisoa hartzea, udal langileen ordainsarien inguruan dauden aukera ekonomikoak aztertzeko. Eta hitzematea 2023–2027 legegintzaldian konpromiso horri eutsiko diotela.
- Ordezkaritza duten alderdiek konpromisoa hartzea negoziazio-mahai horren lehen bilera bat deitzeko 2023ko uztailaren 31 baino lehen.
- Alderdiek konpromisoa hartzea egoera hori konpontzeko beharrezkoak diren baliabide ekonomikoak, teknikoak eta giza baliabideak jartzeko, eta alderdien artean adostutako irtenbide bat bilatzeko. Eta hitzematea 2023–2027 legegintzaldian konpromiso horri eutsiko diotela.
