Antxoberfest: hamalau garagardo eta hiru egunetarako plana
Antxoko Garagardo Festa hilaren 11tik 13ra bitarte ospatuko dute. Garagardoaz gain, sei kontzertu eta 'American crazy cars' erakusketa.
Iazko Antxoberfest. 
Ate-joka da 2023ko Antxoberfest. Aurten maiatzaren 11n hasi eta 13an bukatuko da —ohi bezala, ostegunetik larunbatera— Antxoko Garagardo Festa. Hamalau garagardo desberdin egongo dira dastagarri.
Edariaz gain, gozatzeko besterik ere izango dute antxotarrek. Izan ere, sei kontzertu eta urtero herrira bisitari ugari dakartzan American crazy cars auto erakusketak ere lur hartuko baitute Pasai Antxon egun horietan.
Iaz omenaldia egin zioten festa herrikoiaren antolatzaileek Juanjo Bujanda zendutako antxotarrari. 2023ko kofrade nagusia Antxo Areto Futbola izango da; klub zuri-gorriak hamar urte bete ditu, eta horrek ere emango du zer ospatua Pasai Antxon datozen asteotan.
Antxoko Garagardo Festan egunez egun eta zein ordutegirekin izango diren jarduerak ez dute aurreratu oraindik. Informazio hori jaso eta berehala iragarriko du egitaraua hedabide honek.
