Herriko parkeen alde bilduko dira gaur berriz ere
18:30ean elkartuko dira, guraso talde batek deituta. Musika instrumentuak eramango dituzte gaurkoan. Abian dute sinadura bilketa.
“Orain da momentua” esango dute gaur berriz ere Lezoko gurasoek. Kezkatuta daude herriko parkeek duten egoeraz, haien ustez mantenurik gabe eta zikin daudelako, eta aldi berean herrian dauden parke horien eskaintza oso antzekoa delako. Kezkatuta daude guraso horiek euren haurren, nahiz nerabeen kaleko aisia eta jolas aukera murritza delako.
Gaur, joan den ostegunean bezala, 18:30ean elkartuko dira Gurutze Santuaren plazan, udaletxearen parean. Udalari parkeen gaineko ardura har dezala eskatu nahi diote, hobetu, zaindu eta egoki manten ditzan. Gaurkoan, gainera, musika instrumentuak eramango dituzte are ozenago zabaltzeko euren eskaria. “Ume, haur eta nerabeen ahotsa izaten jarraitzeko” asmoa dute: “Geroz eta gehiago gara mugimendu honetan”.
Zentzu horretan, sinadura bilketa abian dute. Gurasoek HITZAri esandakoaren arabera, “ondo” doa atxikimenduak jasotzeko iniziatiba. Euren sare sozialen bidez lor daiteke informazio gehiago.
