Odol emaileen komunitatea handitzeko lanean
Lau Haizetara Euskaltzaleon Topaguneak, Touringekin elkarlanean, bihar deitu ditu herritarrak odola ematera.
Lau Haizetara eta Touringeko ordezkariak. Argazkia: Lau Haizetara Euskaltzaleon Topagunea Odola ematen, bizia ematera deitu ditu herritarrak Lau Hazietara Euskaltzaleon Topaguneak. Bihar egingo dute odol ematea, Merkatuzarren, 17:00etatik 21:00etara. Beti moduan, odola eman nahi dutenek, telefonoz deitu beharko dute zita 688 76 53 98 zenbakira deituta.
Oraingoan, Touring Kirol Elkartearen laguntza izango du Lau Haizetarak. Izan ere, klubarekin hitzarmena egin du euskaltzaleon topaguneak odol emateetan bidaide izan daitezen. Hala, kirol elkarteak, bere bazkideen artean zabalduko du mezu hori, bat egin dezaten odol emateekin. Kirol elkartearentzat urte berezia da honakoa, mendea bete baitu Touringek.
Odola ematea “gizarte premia” dela esan du Lau Haizetarak, “gure komunitatearen beharrak asetzeko, 40 bat dohaintza egin behar dira 1.000 biztanleko urteko”. Proiektua Gipuzkoako Emaileen Elkartearekin gauzatzen du Lau Haizetarak. Euskara elkartea da, baina hortik harago, “eraldaketa prozesuan” buru belarri hasi zenetik, Errenteria-Oreretaren elkarbizitzan eta gizarte kohesioan laguntzeko gizarte erantzukizuna duen zalantzarik ez du, eta hala, Odola ematen bizia eman iniziatibaren bidez, beste askoren artean, udalerriko euskararen normalizazioaren inguruko pertsonen arteko loturak sortzea duela helburu nabarmendu du.
Odol emaile kopurua haztea du helburu, eta Touring kirol elkartearekin egindako hitzarmena testuinguru horretan kokatu du Lau Haizetarak: “Herritarren %3 odol emaile bihurtzea da gure helburua”. Iaz, Errenteria-Oreretan, 700 odol ematetik gora egin dira.
