320 haur hartuko dituzte Pasaiako udaleku irekiek
Izena ematen dutenen artean zozketa egingo du udalak, tokiak esleitzeko. Matrikula egiteko epea zabalik izango da hilaren 16ra arte.
Adinaren araberako jarduerak antolatuko dituzte uztailean zehar. 
Pasaiako Udaleko Haur, Nerabe eta Gazteen Sustapen Sailak jakinarazi du jada eman daitekeela izena uztaileko udaleku irekietan. Horretarako aukera hilaren 16an bukatuko da, eta ohartarazi dute ez dela epez kanpoko matrikularik onartuko.
Pasaiako zentroetako Haur Hezkuntzako 3 urteko gelatik Lehen Hezkuntzako laugarren ikasturtera arteko haurrak inskriba daitezke udalekuetan. Alegia, 2013 eta 2019 urteen artean (biak barne) jaiotako pasaitarrentzako da udako eskaintza hori.
Udaleku irekiak uztailaren 3an hasi eta 28an bukatuko dira, eta honakoa izango da ordutegia, astelehenetik ostiralera: 09:30etik 13:00etara, egunero (uztailaren 24 eta 25ean salbu, ez baita udalekurik egongo egun horietan). Arduradunak 10-12 haur bitarteko taldeak osatzen ahaleginduko dira, eta horietako bakoitzari begirale bana egokituko zaio.
Izena emateko xehetasunak
Arestian aipatu bezala, hilaren 16a, asteartea, izango da egitasmoan izena emateko azken eguna. Guztira 320 plaza daude, eta matrikulatutako haurren kopurua hortik gorakoa balitz, zozketa egitea aurreikusi dute tokiak esleitzeko.
Inskribapenak formalizatzeko ordainketa egin behar da aurrez. Zehazki, 79,50 euro ingresatu behar dira, dagokion haurraren izenean, honako kontu korronte honetan: Kutxabank ES55-2095-5400-02-1061652334. Familiaren errentaren arabera hobariak daudela esan dute udaletik.
Behin ordainketa eginda, eragiketaren ordainagiria, haurraren osasun txartelaren kopia, eta izena emateko matrikula orria aurkeztu beharko dira eskaera bideratzeko. Dokumentuak fisikoki aurkeztu nahi dituenak HAZ bulegoetara bertaratu beharko du (San Juango Donibane kaleko 19an; Trintxerpeko Alkateordetzan; edo Antxoko Hamarretxeta kaleko 24 zenbakian). Inskripzioa online ere egin daiteke, udalaren webgunean.
