Ez da eskutatik ihes egingo dion saririk
Iñigo Legorburuk bost sari irabazi ditu aste bakarrean. Lana non aurkeztu, saria han. Deban sari bikoitza, Irunen beste bi eta Urnietan bigarren postua.
Iñigo Legorburuk bost sari jaso ditu aste bakarrean. Irudian XXIX On Manuel Antonio Antia lehiaketaren sari banaketan, irabazle izan zen Naiara Zubimendi zumaiarrarekin. Aste bakarra eta bost sari. Non aurkeztuko, saria han. Iñigo Legorburuk sari zerrenda handitzen jarraitzen du, eta oraingoan Deban sari bikoitza, Irunen beste hainbeste, eta Urnietan bigarren saria lortu ditu errenteriarrak. “oso pozik”, hala dago eta ez da gutxiagorako jasotako uzta oparoari erreparatuta, “jada aspaldi xamar lehiaketetara bidali eta ahaztuak nituen lanek ustekabeko fruituak eman dizkidatelako, zorionez”.
Lehenengo eta bigarren sariak lortu ditu Deba 100 hitzetan lehiaketan Huts eta Eskura idazlanekin. Zazpi urtez aurkeztu da lehiaketa horretara, eta aurten lortu du lehen aldiz saria, baten beharrean bi. Lehenengo sariak 300 euro eman dizkio, eta bigarrenak, 200. Debarekin zerikusia 100 hitz baino gutxiagoko lanak aurkeztu behar dira lehiaketa horretara, eta Legorburuk, Oteizaren Arte Eskola famatua. 1969an hezkuntza proiektu bat martxan jarri zuen bertan Oteizak. Bigarren lanean, berriz, Nieves Cabanillas Deva raketista izan du hizpide.
Irunen beste bi sari lortu ditu Legorburuk. Irungo Alardeak —alarde baztertzaileak—,lehen aldiz antolatu duen literatura lehiaketan saritu dute, Gu izateko unea lanarengatik. Beste sari bat ere jaso du Irunen, Euskal herriko Itsasargien Lagunak elkarteak antolatzen duen mikroipuin lehiaketan ere lehena izan da Amona lanarekin.
Urnietan ere lortu du saririk Legorburuk; zehazki, On Manuel antonio Antia lehiaketaren bigarren saria Gutun Mutuak lanarekin. 1.000 euro eta oroigarria eskuratu ditu sariarekin. Lanean, “familia barruan hitz egiten ez diren gai tabuak landu ditut”. Bigarren postuarekin harro, baina “arantzatxoa” ere baduela aitortu du, “bigarrenez finalerako sailkatu eta ezin izan naizelako gailendu oraingoan ere”. Ez du hala ere esperantza galdu eta saiatzen jarraitzeko asmoa agerian utzi du.
