Herriko bi txapelak, herrikoentzat
Lezoko Aurresku Txapelketan Mikel Esnaola eta Enara Artola izan ziren garaile euren kategoriatan. Orain, Euskal Herriko txapelaren bila doaz.
![](https://oarsoaldea.hitza.eus/site/files/2023/05/lezo-dantza-ona_.jpg)
Murixka Dantza Taldeak antolatuta, larunbatean izan zen jokoan Gezala Auditoriumean Lezoko Aurresku Txapelketa. Gipuzkoako Ligaren barruko azken dantzaldia izan zen herrikoa. Gainera, herrian, lezoarrak garaile: Mikel Esnaola izan zen D sailekoen artean onena (2008an eta 2009an jaiotakoak), eta haren ondoren sailkatu ziren Jurgi Errandonea andoaindarra eta Ihintza Erauskin herrikidea.
B sailean ere Lezora txapela: Enara Artola izan zen onena, Danel Castillo pasaitarra eta Julen Lertxundi (Asteasu) hurrenez hurren atzetik izan zituelarik.
Liga bukatuta, Euskal Herriko Txapelketaren bila joango dira herriko dantzariak. Hilaren 14an Errenteria-Oreretan egingo dute A eta B sailetakoena; hilaren 13an izango dute Dkoek dantzaldia Legazpin. Lezoko dantzariak irabazteko faboritoen artean daude, ligan emandako maila oso ona izan delako.