Pablo Gonzalez kazetariari elkartasuna erakutsiko diote
Hilaren 11n egingo dute elkarretaratzea 18:30ean eta ondoren bi adituk hitzaldia emango dute Xenpelar Etxean.
Pablo Gonzalez kazetaria Gerrarik ez plataformak elkarretaratzera deitu du hilaren 11n Pablo Gonzalez kazetariak bizi duen egoera salatzeko. Gonzalez, joan den urteko otsailean atxilotu zuten Polonian, Ukrainiako mugatik kilometro gutxira kazetari lanetan ari zenean, espioitza egotzita. Ordutik Poloniako espetxe batean dute preso, isolamendu erregimenean.
Hilaren 11n egingo dute elkarretaratzea Herriko plazan 18:30ean. Gonzalezen egoera ez ezik, gerra ere salatuko dute mobilizazioaren bidez.
Ez da antolatu duten hitzordu bakarra. Egun berean, 19:00etan, hitzaldia antolatu dute Xenpelar Etxean. Gerraren ondorioak izango dituzte mintzagai, eta zehazki, gudak askatasun murrizketetan duen eraginaz ariko dira. Bi aditu arituko dira horretan: Mikel Aramendi eta Adrian Zelaia. Aramendi kazetaria eta nazioarteko politikan aditua da. Hika aldizkariaren arduraduna, Euskadi Irratiko eta Herri Irratiko tertulietan parte hartzen du, eta Berria zein Gara egunkarietako ohiko kolaboratzailea da.
Zelaia testuinguru geopolitikoaz ariko da. Ekonomia eta politika publikoetan espezializatutako Ekai Center ikerketa-zentroko presidentea eta ekonomia aplikatuaren EHUko irakaslea da Zelaia.
