Motora Mugi sisteman txertatzeko akordioa sinatuko dute
Hilaren 24an formalizatuko du akordioa Gipuzkoako Garraioaren Lurralde Agintaritzak. Oraindik ez dute aurreratu noiz izango den martxan.
Akordioa indarrean sartzean, Mugi txartela erabili ahalko da motoran. 
Azken urteotako gorabeherak gorabehera, Pasaiako motora zerbitzua Mugi sisteman txertatzeko akordioa itxi dute Gipuzkoako Garraioaren Lurralde Agintaritzak eta zerbitzuaren kudeatzaile den enpresak. Hala ziurtatu du Izaskun Gomez Pasaiako alkateak, nahiz eta xehetasun gehiagorik ez duen eman oraingoz.
Eusko Jaurlaritzako Azpiegitura eta Garraio sailburuorde Luis Pedro Marco eta Foru Aldundiko Mugikortasun eta Lurralde Antolaketako Diputatu Rafaela Romero izan dira Pasaiako eledunari akordioaren berri eman diotenak. Izan ere, Gipuzkoako Garraioaren Lurralde Agintaritzaren presidentea baita Marco, eta presidenteordea Romero.
Hilaren 24an Gipuzkoako Garraioaren Lurralde Agintaritzaren batzar orokorra izango da, eta orduko horretan onetsiko dute, Gomezek ziurtatutakoaren arabera, Mugi txartelaren erabilera ahalbidetzea badiako ur bidezko garraioan. Epeei eta bestelako xehetasunei buruzko azalpenik ez du aurreratu nahi izan Pasaiako alkateak, “berehala” egingo dituztelako publiko akordioaren nondik-norakoak.
