AHTaren "txikizioaren kontrako borroka" goretsi dute
AHTaren kontrako borrokak 30 urte bete dituelako, ospakizun eta aldarrikapen jarduerak egin zituzten larunbatean.
Martxaren une bat. Larunbatean, Errenteria-Oreretan hasi eta Donostian bukatuta, AHTaren “txikizioaren kontrako borroka” goresteko eta balioa emateko bizikleta martxa egin zuten. “30 urte hauetan txikizioaren kontra egindako borroka” aldarrikatu nahi izan zuten. “Txikizio handiak egin badira ere, mendiak zulatu eta ehunka iturri lehortu badira ere, obrak 15 langile hil
baditu eta 6 milioi inguruko gastu publikoa egin bada ere, oraindik denboran gaude, eta ahalik eta azkarren AHT gelditu behar dugu”, esan zuten.
Errenteria-Oreretan hasi, Oiartzungo plazara txalo artean iritsi, eta Astigarragarako bidea hartu zuen bizikleta martxak. “Salgaientzako korridorea salatu nahi izan dugu ibilbidearekin”, esan dute antolatzaileek. Azaldu dute, Astigarraga eta Lezo artean egitea asmo duten korridore horren kostua 500 milioi eurokoa dela, “Urumea ibarra gehiago txikitzera eta Pasaiako kanpo portuaren proiektua indartzera dator”.
Astigarragatik Donostiara joan ziren martxalariak. Han, AHTak “hiri eredu turistikoarekin” duen harremana salatu zuten, eta “metroaren txikizioarekin” duen loturaz azalpenak eman zituzten. “Obra handiak egiten ari dira, beharrezkoak ez direnak, obretatik aberasten direnen interesezkoak direlako horiek”, nabarmendu zuten. Tren azpiegitura hirietarako inbertsioak, gizarte beharreko diru kopuruetatik kentzen dituztela adierazi zuten.
Donostiako hainbat eremutatik osteratxoa egin ondoren, Intxaurrondoko Letaman gaztetxean bazkaldu zuten. Han solasaldiak eta kontzertuak egin zituzten: “AHTaren erdia baino gehiago, %60a egin gabe dago oraindik. Gure inguruan
txikizio gehiago egin nahiak jarraitzen du. Erokeria hau amaituko balute ere, kalteak jarraituko du, geuk geldiarazten dugun arte. 30 urteren ostean, borrokak jarraitzen du. AHTrik ez!”.
Ondoko bideoan, antolatzaileek bidalitako bideoan, egunak zer eman zuen ikus daiteke.
