"Berrikuntza eta elkarbizitza" izango ditu EH Bilduk ardatz
'Etorkizuneko Badia' proposamenaren berri eman zuten atzo eskualdeko zerrendaburuek, San Pedroko Lonjako plaza berrian.
Ezker-eskuin, Maddalen Iriarte, Itziar Ostolaza, Teo Alberro, Mikel Arruti, Aizpea Otaegi eta Joana Mendiburu. 
EH Bilduren eskualdeko alkategaiek, zein ahaldungai nagusi Maddalen Iriartek eta Oarso-Bidasoko hautagai Itziar Ostolazak, prentsa agerraldia egin zuten atzo San Pedroko Lonjako plaza berrian, Etorkizuneko Badia proposamenaren berri emateko. Berrikuntza eta elkarbizitza izango ditu gako plan horrek, eta herritarrak ardatz hartuta, enplegua, gizarte-kohesioa eta ingurugiroa hobetzea izango du helburu, adierazitakoaren arabera.
Horretarako bidea, ahaldungai nagusiaren arabera, itsas ekonomia edo ekonomia urdina garatzeko apustua egitea izango da; hots, gailuen elektrifikazioa, itsas-errobotika edota itsasoarekin loturiko kontsumo produktu berriak sustatzea. Eta portuak, noski, saiakeren alde egin beharko du: “Ardura horietako batzuk eskatuko dute uretik gertu egotea, eta uste dugu portuak hori ahalbidetzeko urratsak eman behar dituela”.
Herritarren eta portuaren arteko elkarbizitza “errazteko” konponbideak bilatu nahi ditu EH Bilduk, “uste baitugu industria jardueraren garatzaile bezainbeste, herritarrekiko eta ingurumenarekiko arduratsua izan behar duela badiak”.
Pasaiako alkategai Teo Alberrok hartu zuen hitza Iriarteren ondotik. Trintxerpetarrak elkarte ezberdinen arteko elkarlana jo zuen ardatz. Bide horretan urratsak eginda dira jada: “Askotariko eragileekin hamaika bileretan landu eta partekatu ditugu gure asmoak. Herritarrek etxeetan jaso dituzte jada proposamenak, eta hori dokumentu bizia den heinean guztion ekarpenak jasotzen jarraituko dugu”.
Hemen klik eginda kontsulta daiteke, osotasunean, EH Bilduren Etorkizuneko Badia proposamena.
