Julen Rodriguez: "Ez dugu onartuko Pasaia negozio bihurtzea"
Pasaia "irisgarriago eta inklusiboagoa" nahi du alderdi moreak. Eskola publikoa indartu eta politika feministen aldeko apustua egin nahi dute.
Ezker-eskuin, Miren Etxebeste, Julen Rodriguez eta Ainara Fernandez, atzoko agerraldia bukatuta. 
Podemos Ahal Duguren Pasaiako alkategai Julen Rodriguezek, Miren Etxebeste Gipuzkoako ahaldungai nagusiarekin eta Ainara Fernandez bigarren zerrendakidearekin, “herritarrekin konprometitutako udal hautagaitza” aurkeztu zuen atzo, Antxoko Kultur Etxean.
EAJren eta PSE-EEren partetik Pasaiak “sistematikoki jasaten duen utzikeriari” bukaera emateko gobernu taldean behar du alderdi moreak hurrengo legegintzaldian, Rodriguezen arabera. “Izan ere, batzuek udalerriarekin negozioa egitea lehenesten dute, udalerriko bizilagunek dituzten eskubideen kontura”.
Antxotar zerrendaburuak adierazi zuen premiazkoa dela udalerrian aldaketa bat egitea, “azken bi legegintzaldietan pasaitarrei bizkarra emanda jardun duen gobernuarekin bukatzeko”. Orain arte oposizioko zinegotzi izan denaren arabera, gutxi batzuen interes pribatuei lehentasuna eman die gobernuko koalizioak, gehiengoaren onuren gainetik.
Politika egiteko estrategia horren adibide gisa, Antxoko topoa lurperatzeko obra eta Donibaneko saneamendua aipatu zituen Rodriguezek. Donibanekoa, “auzotarren borondaterik gabe negozioa egiteko” abiarazi dute EAJk eta PSE-EEk, zerrendaburuaren arabera. Topoarena, berriz, Donostiako Kontxako geltokiaren proiektuari lehentasuna eman izanagatik atzeratu izana gaitzetsi zuen atzo eledunak.
“Oposizio eraikitzailearen” errepasoa eta etorkizuneko konpromisoak
Bozeramaileak bere mintzaldian nabarmendu zuenez, Podemos Ahal Duguk oposizio eraikitzailea egin du azken legegintzaldian udalean, eta horrek Karmengo Ama eskola publikoa defendatzeko neurriak hartzera bultzatu du gobernua. Beste saiakera batzuk ere hartu zituen ahoan: “Berdintasunaren arloan, Pasaiako Emakumearen Etxea sor dadin bultzatzeko, bai eta energia-eraginkortasunaren arloan ere, udaleko flotaren errekuntza-ibilgailu fosilak ordezkatzea sustatuz”.
Ainara Fernandez gizarte zerbitzuetako inbertsioa indartzeaz aritu zen. Hezkuntzaren arloan, eskola publiko, laiko, doako, kalitatezko eta diskriminaziorik gabeko baten aldeko apustuaren barruan, Karmengo Aman eskola jazarpenaren aurka borrokatzeko sare bat sortzearen eta sendotzearen alde egin zuen Fernandezek, laguntza psikologikoa emateko sistema publiko iraunkor bat ezarriz.
Indarkeria matxista kasuetan espezializatutako Pasaia nahi du Podemosek, eta irisgarritasun fisiko, sentsorial, komunikatibo eta kognitiboko oztopo guztiak ezabatuko dituena. “Pasaia irisgarriago eta inklusiboagoa”. Asmo horiekin bat ez doazen politiken kontra egiteko konpromisoa berretsi zuten: “Nahiz eta EAJk eta PSE-EEk ahaleginak egin Pasaia beraien negozio bihurtzeko, guk ez dugu onartuko”.
