Lezoko EH Bildu: "Udalak milioi bat euroko laguntza galdu du Itturringo industriagunea berritzeko"
Zonaldea biziberritzeko beharrezkoa zen diru partida udalak ez duela prestatu salatu du koalizioak, beraz, diru laguntza galdu dela.
Itturrin industrialdea. Argazkia: EH Bilduk bidalitakoa. Lezoko EH Bilduk salatu du Eusko Jaurlaritzak Itturingo industriagunea berritzeko emandako diru laguntza galdu duela udalak. “Salatzeko modukoa da EAJ eta PSE-EEren udal gobernuak erakutsi duen seriotasun eta ekimen falta, ez dituelako etxeko lanak egin”, esan dute.
Koalizioko kideek zehaztu dute 2021ean onetsi zen Oarsoaldeko Plan Estrategikoaren barruko laguntza zela Jaurlaritzak emandakoa, jarduera ekonomikorako gune zaharkituen berroneratzera bideratutako partidakoa, hain zuen. Plan horren arabera, Lezoko Udalarentzat milioi bat egokitu zuen Eusko Jaurlaritzako Ekonomiaren Garapen, Jasangarritasun eta Ingurumen Sailak, Oarsoaldeko Garapen Agentziaren bitartez eta Berpiztu planarekin bideratzeko, zehazki, Itturrinerako hiru proiektu finantzatzeko: Olaizolakoa, Itsuko eta Abendañokoa.
Milioi euroko diru laguntza hori jasotzeko, ordea, Lezoko Udalak hainbat zeregin bete behar zituen, EH Bilduk azaldu duenez: “Jaurlaritzaren diru laguntzaren zenbatekoa Itturrin berritzeko kostu osoaren %70ekoa izan behar zen, eta proiektu bakoitzeko gehienez 500.000 eurokoa. Gainerako finantzaketari udalak erantzun behar zion. Aurrekontua denera 1,4 milioi eurokoa zen, beraz, aurtengo udal aurrekontuetan udalak 427.756 euroko partida gordeta beharko luke bere zatiari aurre egiteko. Egin beharreko obrak 2022 eta 2023 urteetan gauzatu behar ziren. Lezoko Udaleko gobernuak 2022rako esandako lanak ez zituen egin, eta 2023an ez du udal aurrekontuetan partidatik aurreikusi lanak egin ahal izateko”.
Bilkideek zehaztu dute azken hilabeteetan esana zutela udala galtzear zela milioi euroko laguntza hori. “EAJ eta PSE-EEren udal gobernuak galdu egin du diru laguntza hori”.
