Inoiz baino herritar gehiagoren babesa nahi du EH Bilduk, "maite dugun herria eraikitzen jarraitzeko"
Herritar guzti-guztien botoek garrantzi bizia izango dutela esan du koalizio subiranistaren alkategai Aizpea Otaegik: "Asko da egin duguna, herri hobea gara, baina gehiago da emateko duguna. Horregatik, inoiz baino gehiago izan behar dugu maite dugun herria eraikitzen jarraitzeko".
Aizpea Otaegi Mitxelena, EH Bilduren alkategaia, zerrendakideek lagunduta. Ostiral gauerdian abiatuko dute Maiatzaren 28ko Udal eta Foru Hauteskunde kanpaina, eta kanpaina horren atarian, Errenteria-Oreretako EH Bilduk inoiz baino herritar gehiagoren babesa nahi duela udal hauteskundeetan esan du. Hala, herritar guzti-guztien botoek garrantzi bizia izango dutela esan du koalizio subiranistaren alkategai Aizpea Otaegik: “Asko da egin duguna, herri hobea gara, baina gehiago da emateko duguna. Horregatik, inoiz baino gehiago izan behar dugu maite dugun herria eraikitzen jarraitzeko”.
Hauteskunde programa osatzeko denbora daramala eragile ezberdinekin elkartzen esan du EH Bilduk, bestalde, “eragileen kezkak entzun eta datozen lau urteetan martxan jartzeko proposamenak biltzen”, eta kanpaina ere logika horretan garatzea duela helburu, ” eskuz esku eta ahoz aho proiektuak azaldu eta kezkak jasotzea, alegia”. Horri begira herritar eta eragileekin elkarlanean ondutako programa azaltzeko eskuorri banaketa egingo dute herriko hainbat puntutan, hainbat egunetan zehar.
Hauteskundeetarako osatutako programa hori, gainera, datozen egunetan iritsaraziko dela udalerriko etxe guztietara azaldu du koalizio subiranistak. Horretaz gain, 50 proiektu baino gehiago biltzen dituen programa hori eskuragarri dago hauteskundeetara begira sortu duten web orrian (hemen klik eginda bisita daiteke) “bertan proiektu esanguratsuen irudiak eta hautagaien zerrenda ere ikusgai dago”.
Hilaren 23an ekitaldi nagusia
Kanpainaren barruko ekitaldi nagusiaren berri ere eman du EH Bilduk. Hilaren 23an izango da, Zumardian, eta Maddalen Iriarte Gipuzkoako Ahaldun Nagusigaiak eta Aizpea Otaegi alkategaiak hartuko dute parte ekitaldi nagusi horretan. Herritar guztiak deitu dituzte parte hartzera.
Bestalde posta bidezko botoa emateko aukera zabalik dela oraindik gogorarazi du EH Bilduk, “zalantza duen edonork 673 06 46 68 telefono zenbakira deitu dezakete informazio eske”.
