Atsedenik gabeko asteburu biribila izan du Pasaia Kayakek
Kimuekin hasi eta beteranoekin buka, Pasaia Kayak taldeko kategoria guztietako kirolariak aritu dira lehian azken asteburuan.
Pasaia Kayak taldeko kimu eta haurrak Mikel Elosegi entrenatzailearekin. 
Pasaia Kayak taldeko kategoria guztietako kirolariak aritu ziren lehian joan den asteburuan, kimuekin hasi eta beteranoekin bukatu, eta “oso pozik” agertu dira talde pasaitarreko arduradunak hitzordu bikoitzean lortutako emaitzekin.
Izan ere, Irunen jokatu zen larunbat arratsaldean kimu eta haurren kategorietako Gipuzkoako Txapelketa, eta hiru domina lortu zituzten guztira urdinek, taldekako sailkapenean lortutako hirugarren postuaz gain.
Kimuek zilarrezko bi domina lortu zituzten, bat Daniel Castrillonek Kimuak B sailkapenean, eta bestea Aitana Etxozortuk, Kimuak A kategorian. Etxezortuk ez zuen arazorik izan domina ziurtatzeko, baina bigarren postua urruti samar geratu zitzaion. Castrillonek, aldiz, lehia estua izan zuen Santiagotarrak taldeko beste hiru kiderekin zilarrezko domina lortzeko, eta 7 segundo eskasengatik lortu ez bazuen ere, azkenean podiumean sartzea lortu zuen, bere lehenengo txapelketa ofizialean.
Oinatz Alonsok iazko garaipena errepikatu zuen egitarauko proba nagusian, Haur mutilen A kategorian, eta Eskola Kiroleko denboraldiko seigarren garaipena, jarraian, erdietsiz. Gipuzkoako Txapelketan ere “nagusitasun osoz” garaitu zituen bere aurkari guztiak, 28 segundoko tartea aterata bigarren izan zen Santigotarrak taldeko Aranbururi eta 51 Iruñeko Piraguismo taldeko Archancori.
K-2 ontzien Euskadiko Txapelketa Irekia
Igandean, aldiz, kadetetik gorako kategoria guztiak aritu ziren lehian talde pasaitarrak etxean antolatuko txapelketa ikusgarrian, eta oso maila onean aritu zen Pasaia Kayak.
Bost urre, bi zilar eta bi brontze lortu zituzten pasaitarrek jokatutako proba guztien artean, eta aipatzekoa Gaizka Lopez kadeteak lortutako bi urreak, Unai Conejero taldekidearekin Getxoko bikotea lehia orekatuan gaindituz, eta Enara Nuñez taldekidearekin ondoren, K-2 mistoan zumaiarren ontzia lehia oso estuan garaituta.
Azkenean, taldekide guztien lanari esker, bigarren izan ziren pasaitarrak taldekako sailkapenean, irabazle izan zen Zumaiako Itxas-Gain taldearengandik 112 puntura. Podiuma osatu zuen Getxo Kayak taldeak.
