Beraun irisgarriagoa da gaurtik
Bi igogailuk osatu dute egi bihurtutako azken proiektua, Maurice Ravel, Aita Donostia eta Juan Crisostomo Arriaga kaleak batzeko.
Errenteriako Udalak irisgarritasun bertikalaren aldeko apustu irmoa egin duen zalantzarik ez da. Hala erakusten dute azken urteetan eraiki dituen igogailuak herritarrei bizitza erraztu eta irisgarritasuna bermatzeko. Beraun auzokoa da amaitu berri duten azken igogailu proiektua, zehazki, bi dira, eta Maurice Ravel, Aita Donostia, eta Juan Crisostomo Arriaga kaleak lotzen dituzte.
Lehen igogailuak Juan Crisostomo Arriaga, Aita Donostia kalea eta azken horren atzealdea lotzen ditu; bigarrenak, Aita Donostia kaleko kontrako espaloia eta Maurice Ravel kalea lotzen ditu.
540.123,17 euroko inbertsioa egin du udalak proiektua gauzatzeko, eta horietatik 266.000 euro Eusko Jaurlaritzatik jaso ditu.
Igogailuak erabilgarri daude dagoeneko.
Eraikitako bi igogailu berri hauekin, orotara hamabost hiri igogailu daude Errenteria-Oreretan. Bizilagunei zerbitzua ematearekin batera irisgarritasuna erraztuz, herri erdigunea eta auzoen arteko kohesiorako elementuak ere bilakatu dira zalantzarik gabe, auzoen arteko komunikazioa erraztuta. Batez beste 3.000.000 bidaia egiten dituzte herritarrek urtean igogailu horietan, 2022an zehazki,, 3.326.315 bidaia egin zituzten denera joan den otsailean Errenteriako Udalak eman zituen erabilera datuen arabera.
