Meipiko Jaien atariko barrikotea egingo dute larunbatean
Sagardotegi menua eskainiko dute larunbateko herri afarian. Horren segidan, musika, edaria eta gaueko parranda.
Datorren larunbatean, 21:00etan, Meipiko pilotalekuan barrikote herrikoia egingo dute. Auzoko jai batzordeak antolatutako afarian sagardotegi menua eskainiko dute, eta jana bukatuta musika eta edaria izango direla ziurtatu dute, “jaiarekin jarraitzeko”.
Afarirako tiketak dagoeneko salgai daude, 17 euroren truke, establezimendu hauetan: Pari Berrin, Ganbaran, Meipin, Juantxon, Irunen, Patxikun eta Txispin.
Ekitaldi hori Meipiko Jaien bigarren edizioaren atarikoa izango da (hilaren 19tik 21era ospatuko dituzte horiek). Aurten ere, programatutako ekitaldiak auzoko txoko guztietara iritsiko direla ziurtatu dute antolatzaileek.
“Mota guztietako publikoarentzat” pentsatutako eskaintza prestatzen ari dira: haurrentzako jolasak, rap kontzertua, rocka, Konstantzia banda, lehiaketak, herri bazkaria, erromeria… besteak beste. Aurreratu dute, halaber, Donipari AF omenduko dutela, elkarren segidako laugarren urtez igo baita taldea kategoriaz.
