Molusku eta algen hazkuntza "eko-eraginkorragoa" bihurtu du Aztik
Horien kultiborako erabiltzen diren soka konpostagarriak sortu ditu zentro teknologikoak. Gaur artekoak plastikozkoak ziren.
Leire Arantzamendi, Aztiko ikerlaria. 
Itsas zabaleko molusku eta algen kultiborako dauden aurreikuspen handiak medio, horiek ekoizteko erabiltzen diren soka “eko-eraginkorragoak” sortu zituen Pasaiako Azti zentro teknologikoak. Lau urte daramatzate Biogears Europa mailako proiektua koordinatzen, eta emaitzak aztertu dituzte orain.
Jatorri fosileko (konpostaezinak) plastiko konbentzionalekin egiten dira orain arteko hazkuntzarako sokak. Plastiko horiek hondakinak eta itsas zaborra sortzen lagun dezakete, eta behar bezala kudeatzen ez badira, itsas ingurumenean ere eragin lazgarria izan dezakete.
Lau urtez koordinatu du Aztik Biogears proiektua. Urtebeteko proben ondoren, muskuilu ekoizpen handiagoak lortu dira bio-soka horiekin, plastiko konbentzionalekin egindako sokekin baino. “Gainera, bio-sokek beren ezaugarri funtzionalak eta iraunkortasun ezaugarriak mantendu zituzten probek iraun zuten denboran”, zehaztu du Leire Arantzamendi taldeko ikertzaileak.
Iraunkortasuna: teknikoa, ingurumenekoa eta ekonomikoa
Ikertzaileek prototipoen iraunkortasuna ebaluatu zuten, alderdi teknikoak, ingurumenekoak eta ekonomikoak kontuan hartuta. Probek erakutsi zuten sokak ez zirela itsasoko uretan degradatzen. Konpostagarritasun probek, berriz, ziurtatu zuten erabat konpostatu daitezkeela sokak baldintza industrialetan, eta horrek lagunduko lukeela hondakinak modu iraunkorrean kudeatzen.
Ebaluatutako prototipoen artean produkzio errendimendu onena erakutsi zuenak %34raino murriztu zuen karbono aztarna bizi zikloan zehar, soka konbentzionalekin alderatuta. Gaur egun, bio-sokak fabrikatzeko behar diren lehengaien kostuak handiagoak badira ere, haien produkzio-errendimenduak gainkostu hori konpentsatzen duela ziurtatu du Arantzamendik.
Jarraian, Aztik sorturiko soken eta horiekin egindako akuikulturaren (uretan animaliak, landareak eta alga hazteko jardueren multzoa da hori) irudi batzuk, zentro teknologikoak hedabide honi bidalitakoak.
