Intxixu-AEK eta Oiartzun Irratiaren aterpe berria izango da Landetxe
Datorren astean hasiko dira lanean, eraikin berrian, euskalgintzako bi eragileak, bertan dauden beste hirurei batuta.
Goiko solairuan egongo da euskalgintzaren topagunea. Euskara da Landetxe eraikinaren zutabeetako bat. Oiartzungo euskalgintzako eragileen aterpe da eraikinaren helburuetako bat, eta goiko solairuan hartuko dute ostatu.
Oiartzungo Udalaren Hizkuntz normalizaziorako saila, Ttur-Ttur Euskaltzaleon Bilgunea eta UEMA jada lanean ari dira Landetxen.
Aste honetan Intxixu-AEK euskaltegikoak toki aldaketa egiten aritu dira, eta astelehenetik aurrera bertan lan egingo dute.
Oiartzun Irratiak ere astelehenean bukatuko ditu lekualdatze lanak, eta beraiek ere datorren astetik aurrera hasiko dira Landetxeko estudiotik emanaldiak egiten.
Euskalgintzako eragileak eraikin berean bilduko dira, beraz. “Proiektu honen helburu nagusietako bat, harremanak indartu, sinergiak sortu eta proiektu berriak hauspotzea da”, esan du Oiartzungo Udalak.
“Ezagutza eta erabilera sustatu eta euskaraz biziko den herria izateko pauso garrantzitsua izango da”.
