Lau errota ezagutzeko ibilaldia antolatu dute etzirako
Gipuzkoako Errota Eguna izango da igandean, eta herrialde osoan 40 jarduera inguru antolatu dituzte. Oiartzuni dagokionez, bost orduko ibilaldia antolatu dute, Fanderian hasi eta bukatuko dena.
Altzibargo Ugarte errota izango da bisitatuko duten bat. Pentsatu gauza batean, eta ziur nazioarteko egun bat izango duela. Gaur —maiatzaren 12a—, adibidez, erizainen, emakume matematikalarien, fibromialgiaren edo osasun begetalaren eguna da.
Aurten mende erdia beteko da Erroten Nazioarteko Eguna ospatu zutela. Hasiera batean urriaren 6an egin zuten jai egun hori, baina maiatzeko bigarren larunbatera pasatu zuten. Herbehereetan hasi ziren egun horren izendapenarekin, non bestela.
Gipuzkoan, egun horren arrimuan, etzi egingo da erroten eguna. 40 jardueratik gora antolatu dituzte herrialde osoan, tartean Oiartzunen. Ihurrita errota sustatzeko elkarteak, herriko errotariek eta udalak elkarlanean ibilaldi gidatua antolatu dute igande goizerako.
Gaur egun lau errota daude martxan Oiartzunen. Etziko ibilaldian horiek bisitatzeko aukera izango dela jakinarazi dute: Iturriozko Txalakako errota (10:00etan); Karrikako Arraskuko errota (11:00etan); Altzibargo Ugarte errota (12:00etan); eta Ugaldetxoko Ihurritako errota (13:00etan).
09:00etan hasiko da ibilaldi gidatua, Fanderiako errotan. 14:00etan bukatuko da, toki berean, eta bidean dauden lau errotetan gelditu, bakoitza bisitatu eta azalpenak entzuteko aukera izango da.
Ibilbide osoa egin gabe nahi den errotako bisitara joateko aukera ere egongo da, zehaztutako ordutegi horietan.
Jarduera doan izango dela esan dute, eta parte hartzeko Oarsoaldeko Turismo Bulegoan eman beharko da izena. 943 49 45 21 telefono zenbakira deitu behar dute interesdunek, edo e-posta bidez idatzi.
