2022an jaiotako oiartzuarrei harrera egingo diete igandean
Iaz jaio ziren 62 oiartzuarrei atsolorra egingo diete datorren asteburuan, Arizmendienean. Ongietorri komunitarioa izango da.
Eguraldi ona egiten badu, Arizmendieneko lorategian izango da atsolorra, iaz bezala (irudian). Datorren igandean, hilak 21, egingo diete atsolorra 2022an jaiotako oiartzuarrei. Haurren gurasoek eta udalak antolatu dute ekitaldia, elkarlanean.
10:30ean hasiko da, eta Arizmendieneko lorategian izango da. Eguraldi txarrarekin, udaletxeko pleno aretora pasatuko dute.
Oihane Mitxelenak eskusoinuaren laguntzarekin hasiko du festa, eta jarraian Ekain Perezek berak sortutako kanta abestuko du.
Ondoren, Iosune Cousillas Kultura zinegotziak udalaren izenean ongietorria emango die pasa den urtean jaio ziren 62 oiartzuarrei.
Jolas abestiak kantatuko dituzte jarraian, 2022ko kintako oiartzuarren zuhaitza osatu aurretik. Haur bakoitzari zapia jarriko diote, eta agurra dantzatuta bukatuko da ekitaldia. Ondoren, hamaiketakoa jateko aukera izango da.
2014an berreskuratu zuten Oiartzunen haur jaioberriei ongietorria komunitatean emateko ohitura.
