Gazteen eta udalaren arteko "elkarlanaren beharra" aldarrikatu du EH Bilduk
EH Bilduk Gazte Ekitaldia egin du, eta Gazteria zinegotzia izango litzatekeena aurkeztu du. Gazteria arlorako dituzten asmoak azaldu ditu.
EH Bilduk deituta, Arizmendienean elkartu ziren ostiral arratsaldean. EH Bildu herriko hainbat gazterekin bildu zen pasa den ostiral arratsean, Arizmendieneko lorategian. “Gazteak entzuteak” eta “elkarlanean aritzeak” duten beharra aintzatestea izan zen helburua.
Bertso sorta batek ireki zuen ekitaldia, eta Haizea Saez de Egilaz egungo Gazteria zinegotziak hartu zuen hitza jarraian. Bukatzear den agintaldiko gako nagusiei errepasoa eman zien, eta eragileekin elkarlanean egindako lanak zein abian jarri dituzten proiektuak izan zituen hizpide.
Jarraian, Nora Velez del Burgo hautagaiak —Berdintasun Sailaz arduratuko litzateke— datozen lau urteetarako dituzten asmoen laburpena egin zuen. Gazteen eta udalaren arteko elkarlanaren beharra eta garrantzia azpimarratu zuen.
“Prestutasuna”
Alkatetza lortzekotan, EH Bilduk Ekain Susperregi proposatuko du Gazteria zinegotzi izateko. Aurrera begirako plan eta proposamenak zeintzuk ziren azaldu zituen.
Ekain Susperregi eta Nora Velez del Burgo hautagaiek hartu zuten hitza.
Hainbat gai jorratu zituen Susperregik: musika-taldeen entsegu lokalaren erabileraren berrikuspena, gazte sortzaileei eskainiko zaizkien laguntzak, gazte mugimenduen eta instituzioen arteko harremanen artikulazioa, onartu berri den etxebizitza lege berria…
Bertaratutakoei esan zien “prestutasuna” duela gazteen proposamenak entzuteko zein elkarlanean aritzeko datozen asteetan.
EH Bilduk gazteekin egindako ekitaldia Oiartzun “gazte begiradatik eraikitzeko” prestutasuna agertzea izan zela azaldu du koalizioak, eta udalak horretarako “potentzialtasuna” eta “nahia” baduela esan dute.
