[Galeria] Lekuona Fabrikan banatu dituzte Musika Bulego Sariak
Merina Gris, Su ta Gar, Neomak, Mice, Ines Osinaga, Teresa Catalan, Elena Setien, Enrike Solinis eta Kepa Junkera dira saritu dituztenak. Gainera, Etxepare institutuak urtero egin ohi duen euskal musika mugaz kanpo nazioartera zabaltzeko egindako lanaren aitortza, Oreka TX taldeak jaso du.
Euskal Herriko Musika Bulegoak Musika Bulego Sariak banatu ditu zazpigarrenez. Lekuona Fabrikak hartu zuen atzo arratsaldean sari banaketa ekitaldi hori. Lau musika talde eta sei artistaren lana aitortu dute sariek: Oreka TX, Merina Gris, Su ta Gar, Neomak, Mice, Ines Osinaga, Teresa Catalan, Elena Setien, Enrike Solinis eta Kepa Junkera.
Euskal Herriko Musika Bulegoko EHMBEko zuzendari Amaia Izpizuak sari emate ekitaldian nabarmendu zuenez, “euskal musikaren aniztasunaren isla” izan da Lekuona Fabrikako aretoan bizi izandakoa, “genero, erritmo eta doinu mota ugariren ordezkari baitira aurtengo saridunak”.
Musikagintzan aritu eta aditu diren zortzi pertsonek osatu dute epaimahaia, eta zortzi sariak emateko erabakia hartzeko, Euskal Herriko artista eta taldeen 120 musika proiektu eta proposamen aztertu dituzte aurretik. Merina Gris, Su ta Gar, Neomak, Mice, Ines Osinaga, Teresa Catalan, Elena Setien, Enrike Solinis eta Kepa Junkera dira saritu dituztenak. Gainera, Etxepare institutuak urtero egin ohi duen euskal musika mugaz kanpo nazioartera zabaltzeko egindako lanaren aitortza, Oreka TX taldeak jaso du.
Saritutako proiektu bakoitzak, 2.000 euroko diru saria eta Fernando Mikelarena artistak diseinatutako eskultura jaso zuen.
Euskal Herriko Musika Bulegoa Elkarteko zuzendaritza batzordearen ohorezko sari berezia berriz, Kepa Junkerak jaso zuen, “euskal kultura eta euskara nazioartera modu berritzailean eramateagatik, trikitixa erritmo, instrumentu eta estilo berrietara egokituz”. Aitortza horren bidez, Bilboko trikitilariaren ibilbide oparoa bera ere goraipatu nahi izan du EHMBEk.
Afrika Bing Bang eta Jon Gomezek gidatu zuten sari banaketa, eta saritutako talde eta musikarietako batzuk zuzenekoa ere egin zuten ekitaldian; Oreka TX, Elena Setien, Enrike Solinis eta Ines Osinagaren doinuak entzun ahal izan dira.
Musika Bulego elkarteak hainbat datu ere eman zituen. Emakumeen proposamen kopurua nabarmen igo zela iaz azaldu zuen, eta aurten ere baieztatu egin omen da genero arrakala hori iraultzen ari dela gaineratu: “Lanen %42k izan du emakumeen lidergoa”. Lanen %70, gainera, euskara erabiltzen dute eta uzta ere askotarikoa izan da estiloari erreparatuta, klasikoa, folka, jazza, musika elektronikoa eta estiloen arteko fusioak dira sarituen artean.
Ondoko galeriako argazkiak Musika Bulegoa Elkarteak egindakoak dira.
