Haur eta gazteekin osatu nahi dute madalenen egitaraua
Haur eta gazteen jai batzordeak martxan jarri dituzte. Gazteen lehen bilera hilaren 25ean izango da; haurrena, berriz, hilaren 26an.
Holi txupinazoa Gernika plazan artxiboko irudi batean. Inork ez ditu beraiek baino hobeto ezagutzen dituzten gustuak, zerekin disfrutatzen duten, zein musika entzuten duten. Hori horrela, aspaldi erabaki zuen udalak zuzen zuzenean galdetu eta haiekin batera jai egitaraua osatzea zela gakoa. Aurten bide beretik arituko dira, eta dagoeneko hilabete honetan bertan egingo dituzte Haurren Jai Batzordearen eta Gazteen Jai Batzordearen lehenengo bilerak.
Gazteek izango dute lehen zita, eta horretarako 13 eta 17 urte arteko gazteak parte hartzera deitu ditu. Lekuona Fabrikan izango da bilera hilaren 25ean, osteguna, 18:00etan hasita. Haurrena, berriz, 26an izango da (ostirala) 17:30ean, Lekuona Fabrikan.
Bilera egunaren aurretik, hala ere, gazteen proposamenak jaso nahi ditu batzordeak egitarauan txertatzeko. Proposamen horiek, ondoren, uztailaren 24an Gernika plazan antolatuko duten Gazte Gunea osatzeko erabiliko dira batez ere. Proposamenak jasotzeko epea hilaren 22an (astelehena) amaituko da, eta horiek galdetegi bat osatuta bideratu behar dira. Horretarako klik egin hemen.
Udaletik haur eta gazteak parte hartzera deitu dituzte, “jaiak herritik eta herriarentzat direlako, eurekin kontatu nahi dugu”.
