9 domina poltsikoratu ditu Pasaia Kayakek Espainiako II. Kopan
Hamabi kirolarik ordezkatu dute talde pasaitarra kategoria guztietan, haurretatik hasi eta beteranoen mailara arte.
9 dominekin bueltatu da etxera Pasaia Kayak Tarragonatik (Katalunia), bertan lehiaturiko Itsas Kayakeko II. Kopan egindako lan txukunaren adierazgarri. 400 kirolari baino gehiago bildu zituen probak.
Hamabi kirolarik ordezkatu zuten talde pasaitarra kategoria guztietan, Haurren kategoriarekin hasi eta Beteranoen mailara arte. K-1ean zein K-2an, probak bikoizteko aukera eman zuen lehiaketaren bi eguneko egitarauak, eta “ondo baino hobeto” eutsi zioten urdinek erronkari, klubetik adierazi dutenez.
Bakarkako lanean, Eukene Saez errenteriarrak eta Lander Rodriguez pasaitarrak lortu zuten urrea beteranoen kategorian, eta binakako lanean, aldiz, Maialen Vitoriak eta Iker Lizasok osatutako K-2 mistoak nagusitasun handiz lortu zuen garaipena.
Zilarrei dagokienez, Ioar Alonso pasaitarrak bigarren postua lortu zuen Kadeteak A kategorian, Txema Yarzak bere adin tarteko Beteranoen kategorian, eta Aritz Aranetak eta Ion Carballok osatutako K-2ak gauza bera erdietsi zuen Senior kategorian, sekulako lana egin ondoren, Espainiako bikote onenekin lehian, meritu handiko bigarren postua lortuz. Aranetak lan bikaina egin zuen seniorren bakarkako proba nagusian ere, top-10ean sartzea lortuz; emaitza aipagarria, kopako sailkapen zailenean.
Brontzeei dagokienez, Iñaki Fernandezek lortu zuen domina hori bakarkako lanean, Beteranoen kategorian. Binakako lanean, aldiz, Fernandez bera Eukene Saez taldekidearekin hirugarren sailkatu zen K-2 mistoan, eta postu bera lortu zuten Ramon Vegak eta Txema Yarzak, Beteranoak +50 kategorian.
Dominarik gabe, baina txukun
Gainera, dominarik atera ez zuten probetan ere, emaitza bikainak lortu zituzten Pasaiako palistek, eta hamabigarren postu aipagarria lortu zuten urdinek taldekako sailkapen orokorrean, 40tik gora talderen aurkako norgehiagokan.
Beste bi domina ere eskura izan zituzten pasaitarrek bakarkako lanean Oinatz Alonsorekin Haurren kategorian eta Iker Lizasorekin Junior kategorian, baina horrek ez dio inola ere itzal egiten lortutako emaitzari. Taldeko arduradunak “oso pozik” agertu dira Katalunian izandako esperientziarekin: “Indarberritu egingo du taldeak modalitate honen alde egiten duen apustua”.
Marea Urdinak bere ubera utzi zuen Kataluniako uretan, eta, zailtasunak zailtasun, Oarsoaldeko piraguismoa ordezkatzen jarraituko du doan lekura doala. “Laguntza guztiak izango dira ongietorriak bide horretan”, adierazi dute, “Marea Urdinak ez du etenik!”.
