Gaztañoko igogailuko lanak esleitu ditu udalak
Hamazazpi pertsonarentzako tokia izango du, eta erdigunea eta auzoa lotzeko 12 metroko desnibelari aurre egingo dio. 663.000 euroko aurrekontua dute lanek.
Erdiguneko sarrera Madalenaren basilikaren alboan legoke. 12 metroko desnibela gaindituko du Gaztañon eraikitzekoa den igogailuak, auzotik erdigunerakoa (eta alderantziz). Osotara hamazazpi pertsonarentzako tokia izango du, baldin eta 1.275 kilo gainditzen ez badituzte. Bizikletak bertan sartu ahal izango dira, eta herriko gainerako igogailuen ordutegiarekin funtzionatuko du, hau da, egunero 06:00etatik 01:00etara.
Horiek dira Gaztañon eraiki asmo dagoen igogailu publikoaren ezaugarriak. Mugikortasun azpiegitura egiteko lanak jada esleitu ditu udalak, 663.648 euroko aurrekontuarekin: Iparragirre Eraikuntza Lanak SL enpresaren gain geldituko da gorantz eta beherantz joateko gailua eraikitzeko ardura: obrak hasten direnean, sei hilabeteko epea izango dute horiek egikaritzeko.
Igogailua eraikitzeaz aparte, eraikuntza proiektuaren barruan jasota dago Zabaleta Anaiak kaleko 1 eta 2 etxebizitza blokeen atzealdean dagoen oinezkoentzako pasabidea irisgarri bihurtzea, Altxu kalearekin bat egin arte. “Horrela, puntu horretatik auzoaren erdialdean eta mendebaldean dauden eraikin gehienei emango zaie zerbitzua”.
