"NATO ez", Oiartzunen
NATO gaitzesteko eta Ukrainako gerraren nondik norakoak azaltzeko hitzaldia eta elkarretaratzea egingo dituzte herrian.
Adrian Zelaiaren hitzaldia hilaren 24an izango da. Nato ez, gerra inperialistarik ez! lelopean, hainbat jardueran egingo dituzte hilaren bukaera aldera Oiartzunen. Zehazki, hitzaldia eta elkarretaratzea izango dira “ez dugu beraien gerran parte hartuko” ideia nabarmentzeko egingo direnak.
Hitzaldia hilaren 24an izango da, 19:00etan Manuel Lekuona Bibliotekan. Ekai Center-eko Adrian Zelaiak NATOren estrategiaren gainekoak eta Ukrainako gerraren nondik norakoak azalduko ditu.
Hilaren 26an, berriz, elkarretaratzea egingo dute Done Eztebe plazan. 18:00etan hasiko da, “gerra inperialista eta herri langileen itotzea” salatzeko helburuarekin.
“Aski da!”, esan dute deitzaileek: “1990eko hamarkadan hartutako konpromezuaren kontra, Estatu Batuen beso armatua, morroi europarrez osatutako NATO, hainbat herrialdez jabetu da modu desberdinez. Ukrainan, aspaldiko helburua, 2014an estatu kolpe baten bidez (herri mugimendu europarzalez mozorrotua) gerra bultzatu zuen, orain propaganda inperialistaren protagonista dena, Errusiaren esku hartzea dela eta. Washington eta Moskuren artean, lehenengoaren morroi diren estatu europarretako herriok itotzen gaituzte euren gerra ordaintzeko, zerbitzu publikoak are gehiago murriztuz eta bizitza garestituz”.
