Otxote Topaketak girotuko du igandea
Ohikoa den bezala, Madalenaren basilika eta herri erdialdeko hainbat taberna hartuko ditu Otxote Topaketak. Niessen Elkarteak antolatuta, 12:00etan hasiko da kontzertua basilikan.
Otxote Topaketaren hamabigarren ekitaldia igandean, Niessen elkarteak antolatuta. Otxote Topaketaren hamabigarren ekitaldia egingo dute igandean, hilak 21. Ohikoa den bezala, Madalenaren basilika eta herri erdialdeko hainbat taberna hartuko ditu Otxote Topaketak. Niessen Elkarteak antolatuta, 12:00etan hasiko da kontzertua basilikan. Aurten, Bilboko Argia, Irungo Nayade, Oreretako Karnaba, Gasteizko Iradier, eta Castro Urdialesko Arduak (Kantabria, Espainia) otxoteek hartuko dute parte.
Tabernetara eramango dute ondoren, kantu festa, 13:30etik 14:30era, eta Maite, Lekuzaharra, Gamon 14, Sindikato, eta Lekuona Fabrikako kantinan egingo dituzte kantu saioak.
Urtero moduan, aurten ere, ahalegin berezia egin dute antolatzaileek emakumeen otxoteen parte hartzea bermatzeko Niessen elkarteko eta topaketaren antolatzaile den Alberto Mendigutxiak azaldu duenez: “Oso zaila da emakume otxoteak topatzea eta lanketa handia eskatzen digu”. Emakumeen bi otxote arituko dira aurten, Nayade eta Iradier. Kartelaren irudiari ere egin dio erreferentzia Mendigutxiak, “Juan Manuel Uria olerkari eta pintoreak egin du, eta Pentagrama du izena lanak”. Ekarpena eskertu dio.
Lagundu duten komertzio guztiei ere esker ona azaldu die Niessen elkarteko kideak, baita Madalena Basilikaren Lagunak elkarteari ere, “beti erakusten duen prestutasunarengatik”.
Maite Gartziak otxote topaketa “jai zoragarria” dela esan du bere aldetik, “aurten ere hala izango da ikusten ari garenez eta herritar guztiak animatu nahi ditut parte hartu eta gozatzera. Oso egun polita izango da”.
