Herrian bizi diren hizkuntza eta kultura guztien aitortza publikoa egin du udalak
Atzo izan zen Kultur aniztasunaren Nazioarteko Egunaren harira adierazpen instituzionala egin du udalak.
Errenterian 11 Kolore egitarauaren barruan kalejira egin zuten atzo. argazkia: Itziar Ostolaza Kultur Aniztasunaren Nazioarteko Eguna izan zen atzo. Horren harira, adierazpen instituzionala egin du gaur errenteriako Udalak, eta horren bidez, aitortza egin die herrian bizi diren hizkuntza eta kultura guztiei eta haien eramaile diren pertsonei: “Bakearen bermerik onena delakoan, gainera, herriko kultura anitzen arteko elkarrizketa ahalbidetu nahi dugu, azken urteotan irekitako bide emankorrean sakonduz”.
Komunitate sena indartzea herri gisa aurrera egiteko “bermerik handiena” dela baietsi du udalak, eta auto antolakuntza ahalegina aitortu jatorri anitzeko herrikideei, “erraza ez izanagatik ere, asko direlako azken urteotan haien artean elkartu eta elkarteak sortzeko apustua egin duten komunitateak, haien jatorriko kulturaren ernamuinetik Errenteriari ekarpena eginaz”. Elkartegintza “zabal” eta “anitzagoa” izatea altxorra dela udalarentzat gaineratu du adierazpenean eta hartu dituen konpromisoen berri eman du, halaber.
Bizikidetza linguistiko eta kulturalaren bidean eragile ezberdinekin lanketa bateratuak garatzeko; Errenteriako herritar oro eskubide eta aukera guztien jabe izan dadin lanean jarraitzeko, edozein dela jatorria herrikide horiei herritartasun osoa aitortua izan dakien; kultura ezberdinen arteko topaguneak sortzen jarraitzeko eta ekimen bateratuak sustatzeko; hezkuntzaren esparruan lanketak egiten jarraitzeko; hizkuntzen aniztasuna balorean jartzean jarraitzeko; eta herriko aniztasun kultural eta linguistikoa bistaratzeko ekimenak burutzen jarraitzeko konpromisoa hartu du udalak.
Hemen klik eginda adierazpena osoa irakur daiteke.
