Urteko lehen bainua, Xoxolurrekin
Xoxolur Mendi Klubeko kideek sasoiko zortzigarren irteera egin zuten atzo. Itsas ertzeko mendiaz gozatu, eta itsasoa besarkatu zuten.
Kontraesana irudituko zaie irakurleei, mendi talde baten irteeraren kronikaren titular nagusia izatea haiek itsasoan bainua hartu zutela. Baina egiari beti zor, hala izan zen. Batzuentzat, ziurrenik, urteko lehena gainera (konfirmatu gabeko datua da honakoa). Bai, mendi buelta egin zuten Xoxolurrekoek atzo, Deba eta Zumaia artekoa, itsas ertzetik. Baina sasoiko zortzigarren txangoak emandako unerik gogoangarriena, mendiko bistetaz, itsasoaz, Kantauriko haizearen freskotasunaz, flysch-aren magiaz eta lagun giro bikainaz gozatzeaz gain, bainuarena izan zen.
Esan bezala, Xoxolur Mendi Klubak 2022-2023ko zortzigarren irteera egin zuen atzo. Izan dituzte txango jendetsuagoak, baina atzokoaren zirrara bertara joan ziren hamahiru kideek bakarrik sentitu zuten. Mendia aske sentitzeko baliabide bada, eta horri Itzurun hondartzan itsasoarekin besarkatzeko eransten bazaio, emaitza sekulakoa da. Atzokoa horren adibide.
Hurrengo irteera ekainaren 18an egingo dute Lezoko mendizaleek. Aurrerago emango dituzte horren gaineko xehetasunak. Jarraian, atzoko irteerako hainbat irudi.
