Esku huskako pilotariek aurrera egin dute Herriartekoan
Zaldibiari sei partidak irabazita lortu dute aurrera egitea. Azkoitia izango dute arerio, Madalensoron. Gomazko paletan, Zumarragak kanporatuta.
Esku huskako pilotariek Gipuzkoako Herriarteko Txapelketan aurrera egitea lortu dute. Joaneko hiru partidatan alde polita lortu zuten, eta pasa den ostiralean nagusitasuna berretsi zuten.
Izan ere, Oiarpeko pilotariek hiru partidak irabazi zituzten. Kadeteetan, Manex Olaiz eta Markel Goiak 22-5 irabazi zuten. Jubeniletan, berriz, Axel Lasak eta Aritz Heviak lan erdietan utzi zituzten zaldibiarrak. Senior mailari dagokionez, Andoni eta Iñigo Ugaldek modu estuagoan lortu zuten garaipena: 22-17.
Final laurdenetako arerioa Azkoitia izango da. Joaneko partidak ostiral honetan bertan jokatuko dituzte, Madalensoron. 21:00etan hasiko da pilota jaialdia.
Gomazko paletan, kanpora
Gomazko paletako txapelketan, oiartzuarrek joaneko hiru partidetatik bi irabazi zituzten, baina tantotan galdu zuten.
Pasa den asteburuan Zumarragan jokatu zuten, eta bi galdu zituzten, eta bat irabazi. Banakako partidan 20-3 galdu zuten, binakako partida 10-20 irabazi zuten, eta 7 koadrokoan tanto bakarrarengatik galdu zuten.
Hirugarrena, asteburuan
Larruzko paleta eta pala motza bateratzen dituen txapelketaren lehenengo fasea jokatu dute, baina Oiartzun asteburu honetan hasiko da.
Finalerdietan zuzenean sartuko dira, eta Donostia izango dute arerio. Altzako pilotalekuan arituko dira, igande goizean (10:00etan). Bueltakoa Madalensoron izango da, hurrengo asteburuan.
