Inoiz baino "kaletartuago" dator Eztena
Eztena Antzerki jaialdiaren barruan hiru tailer antolatu dituzte. Horietarako izena hilaren 31 baino lehen eman behar da.
Kalearen gaitik abiatuta dator Eztena Antzerki Jaialdia, antolatzaileek azaldu dutenez, “inoiz baino kaletartuago” heldu, gainera. Ekainaren 9, 10 eta 11n arte eszenikoen menpe izango da Errenteria-Orereta, eta hiru egun horietan zehar, ikuskizunak, performance kolektiboak eta astean zehar egingo dituzten tailerren erakustaldiak ikusi ahal izango dira Zumardian, Lekuona Fabrikan, Niessen auditorioan eta Erdialdeko kaleetan.
Honakoan kaleetan badenarekin eta kalean ikusten ez denarekin lan egin nahi dutela azaldu dute, “kalera atera esaten dugunean, kalera sartzen ari garela esan genezake. Eguneroko kaleko hartu emanei eta arteak kalean duen presentzia beharrari keinu egin nahi diegu aurten”.
Hamalau urte dira Eztena jaialdia sortu zutenetik. Edukietan, formetan zein antolakuntza moduetan arriskuak hartzen zituztenei plaza bat eskaintzea zuen helburu; horretan tematu dira ekitaldi hauetan guztietan eta lortu dutenik ezin da uka. Urte horietan guztietan zuzendaritza lanetan aritu den taldeak esperimentu berria egitea erabaki du aurten jakinarazi dutenez, eta arrisku berri bat hartu: “Eztena jaialdiko antolakuntzan aritu diren eskarmentudunek, arte eszenikoen munduan dabiltzan hainbat gazteri utzi diete aurtengo edizioa martxan jartzeko ardura”. Hortaz, aurtengoa, Eztenako lan talde beteranoak eta gazteak, Zizt kultur elkarteak eta Errenteriako Udalak osatu dute aurtengo ekitaldia.
Horraino aurreratu dutena antzerki jaialdiaren gainean, beste guztia ezagutzeko pixka bat itxoin beharko da oraindik, hilaren 31n egingo baitute aurkezpen agerraldia. Bien bitartean, zabalik dagoena da antolatu dituzten hiru ikastaroetarako izena emateko epea. Ekainaren 5etik 10era bitartean egingo dituzte hirurak, eta hilaren 31 da izena emateko azken eguna.
Ekintzak eta lekuak soinutu tailerra emango dute Myriam Rzm eta Garazi Gorostiaga, soinuarekin edota musika elektronikoarekin nolabaiteko erlazioa duten pertsonei zuzendutakoa. Oreretako kaleetan egingo dute eta euria eginez gero, koldo Mitxelenako jolastokian, ekainaren 9an, 10:00etatik 14:00etara. Momentua bizi, espero ez dugun gorputz baterantz tailerra emango dute Koldo Arostegi eta Eneko Gilek, eta inprobisatzen lagunduko duten jarraibideak praktikatzeko gunea izango da. Ekainaren 5rtik 8ra 16:00etatik 20:00etara izango da Dantzagunean.
Azkenik, Gorputzak pasieran tailerra emango dute Marina Suarez eta andrea Berbois, eta gorputza eta paisaiaren harremana landuko dute. Lekuona Fabrikako sorlekuan izango da ekainaren 6tik 8ra, 16:00etatik 20:00etara.
Izena emateko egin klik hemen eta ikuskizunetarako gonbidapenak eskuratzeko berriz, egin klik hemen.
