Kanpainako ekitaldi nagusia bihar egingo du EH Bilduk
Iluntzean izango da itxiera, Trintxerpeko Gudarien plazan. Egunotan eskuorriak banatzan izango dira, barruti bakoitzeko proposamenekin.
EH Bilduren Gipuzkoako ahaldungai nagusi Maddalen Iriarte, eta Pasaiako alkategai Teo Alberro, Pasaian. 
Pasaiako EH Bilduk kanpainako ekitaldi nagusia egingo du bihar, 19:00etan, Trintxerpeko Gudarien plazan. Bertako gonbidatu nagusiak koalizioaren herriko alkategai Teo Alberro eta Gipuzkoako Ahaldun Nagusirako hautagai Maddalen Iriarte izango dira.
Itxiera ekitaldiaz gain, aste honetan zehar barrutiz barruti egiten ari diren gerturatze jardueren berri ere eman du herriko koalizioak. Atzo eguerdian Donibanen aritu ziren programaren zenbait proposamenen eskuorriak banatzen, eta hauek dira hurrengo deialdiak: gaur, 12:00etan, San Pedron izango dira, 17:00etan Trintxerpen, eta 18:00etan Antxon. Bihar, osteguna, ekitaldiaren bitartean Trintxerpen izango dira, eta ostiralean 12:00etan Trintxerpen, 17:00etan Antxon eta 19:00etatik aurrera San Pedro eta Donibanen.
