Euskara ikasteko diru laguntzak daude Lezon
Sei lerroko sistema prestatua du Lezoko Udalak. Euskaltegian matrikulatuta daudenek uztailaren 3a baino lehen eskatu behar dute diru laguntza.
Lezoko Udalak sei lerroko diru laguntza sistema du, euskara ikasi edo euskararekin harremana duten jarduerak sustatzeko. “Lezoko Udalaren helburu nagusietako bat da euskararen ezagutza eta hobekuntza sustatzea, familia giroan eta gizartean oro har, euskararen erabilera bultzatuz”, argitu du udalak. Hala, sei lerro horietarako 38.000 euroko diru zatia du gordeta. Oinarri zehatzak eta eskabideak Lezoko Udalaren webgunean ikus daitezke.
Honakoak dira sei lerroak:
- Euskara euskaltegian ikasten dutenentzakoa. Lezoko Udalak euskaltegiko matrikulen %100 itzultzen die %85etik gorako asistentzia duten ikasleei.
- Euskaraz emandako udako ikastaroen matrikulazioa laguntzeko lerroa, UEUko eta EHUko ikastaroetakoa.
- Aisialdiko begirale/zuzendari ikastaroaren matrikulazioa kostuak ordaintzeko laguntzak.
- Elkarteen/erakundeen lokaletako edota merkataritzako enpresetako errotulua euskaraz jartzeko diru laguntza.
- ‘punto.eus ‘domeinua hartzeko laguntza.
- Udalerriz gaindiko eremuetan euskara sustatzen dabiltzan erakundeentzako laguntzak.
Euskaltegian matrikulatzeagatik eskaintzen den diru laguntza uztailaren 3a baino lehenago eskatu behar da. Besteak urtean zehar eskatzeko aukera dago.
