Ekainean lau urte beteko ditu Emakumeen Etxeak
Urteurrena ospatzeko, Emakumeen Etxeak egitaraua osatu du datozen asteetarako, herriko hainbat eragilerekin elkarlanean.
Emakumeen Etxea lepo, Maria Naredoren hitzaldia jarraitzeko. Argazkia: Mendi Urruzuno Ekainean Emakumeen Etxeak lau urte beteko ditu. Honenbestez, Errenteria-Oreretako emakume guztiak erakarri nahi ditu hilabete osoan zehar antolatuko dituen ekimenen bidez. Hona hemen Emakumeen Etxearen ekaineko egitaraua:
Ekainaren 8a, osteguna
- 18:30etik aurrera, Hunkitu gaitezen abesten. Eta abestien bidez sintonizatuko bagina? tailerra. Emakumeen arteko ahozko kantua berreskuratzera begira, denbora eta espazioa eskainiko zaie emakumeei haien artean abes dezaten. Sarrera doakoa izango da, eta 20 plaza irekiko dituzte.
Ekainaren 10a, larunbata
- 10:00etatik 13:00era: #puntuetakitto tailerra, Kaleak gureak dira lelopean. Ehuntzeko Nazioarteko egunean, Emakume Etxeak eta Eskola Feministako Kakorratz sareak herritar guztiei jendaurrean ehuntzeko aukera eskainiko diete. Era berean, tailerrean parte hartuko dute Errenkoalde merkatarien elkarteak, Artile Mataxak dendak, eta Lore-Toki nahiz Laguntasuna emakume elkarteek.
- 14:00etan: Laugarren Urteurreneko ekitaldi nagusia, Emakumeen Etxeko Batzarraren eskutik.
- 14:30ean: bazkaria. Menu itxia, aukera begetarianoarekin. Tiketek 15 euro balioko dute; bost euro langabe, pentsiodun eta ikasleentzat. Tiketak erosteko: Emakumeen Etxean (maiatzaren 30ean, 16:00etatik 18:00etara; maiatzaren 31n, 18:00etatik 20:00etara; ekainaren 5ean, 11:00etatik 13:00era), edo Arkaitza eta Reina tabernetan (maiatzaren 30etik ekainaren 6ra).
Ekainaren 15a, osteguna
- 18:00etan: Eskola Feministaren ikasturtearen amaiera. Lehenik, Pepa Bojo psikologoaren hitzaldia, bere Gipuzkoako ahalduntze taldeak: parte hartzeko motibazioa eta aldaketa aipagarriak azterlanaren inguruan. Ondoren, Eskola Feministako ikasleek hausnarketak partekatuko dituzte.
Bestela ere, Emakumeen Ettxearen ordutegia honakoa da: astelehen eta ostiraletan, 09:00etatik 13:00era; eta asteartetik ostegunera, 16:00etatik 20:00etara.
