Ipar martxa ibilbide berria aurkeztuko du Urdaburuk, ekainaren 2an
17:00etan abiatuko dira interesdunak Iztietatik. Monitore batek oinarrizko azalpenak emango ditu, eta luntxa eskainiko dute ondoren.
Iztietatik abiatuko da ibilbide berria. Datorren ekainaren 2an, osteguna, Urdaburu Mendizale elkarteak ipar martxako SL-GI 56 ibilbide berria aurkeztuko du. Parte hartzaileak arratsaldeko 17:00etan elkartuko dira, Iztietako pasealekuko oinezkoen zubiko eskaileren aldamenean.
Aurkezpen saioan Mario Villalba monitore tituludunak kirol hau praktikatzeko oinarrizko azalpenak eskainiko ditu, ibilbidea egingo dutelarik ondoren. Parte hartzaileei ipar martxako bastoi bereziak utziko dizkiete, bederatzi kilometro eta 136 metroko desnibela dituen zirkuitua osatzeko. Ibilbidea amaitzean, mendizale elkarteak otordu txiki bat eskainiko die parte hartzaileei, Juan de Olazabal kaleko egoitzan.
Jarduera doakoa izango da, baina makilak erabiliko dituzten herritarrek aurrez eman beharko dute abisua. Horretarako, asteartean 19:00ak eta 21:00ak artean egoitzara bertaratu, egun eta ordutegi berdinean 943 527 879 telefonora deitu, edo formulario hau bete beharko dute.
Urdaburuk sortutako ibilbide berria diruz lagundu du udalak, baita Gipuzkoako Mendizale Federazioak homologatu ere.
