[Argazki galeria] Oiartzuarrek irabazi dute desafioaren lehen atala
Sasoi-sasoian heldu dira kirol desafioan parte hartu duten bi taldeak. Errebantxa bi asteburu barru izango da, Lezoko Sagardo Egunean.
Oiartzuarrak trontzan. Aurtengo sagardo egunari hasiera berezia emateko Oiartzungo eta Lezoko neska-mutilek herri kirol desafioa egin dute. Goizeko 11:30etan lehiakideen aurkezpenarekin eman diote hasiera probari. Aurkezleek, gainera, eskerrak eman dizkiete antolatzaileei, bai eta desafioa ikustera gerturatu diren guztiei ere.
Aurrenik trontzan aritu dira. Ondoren, 40 sagar banan-banan bildu behar izan dituzte. Jarraian, zakua bizkar gainean jarri eta sei plaza burutu dituzte. Gero, 70 kiloko harriari zortzi jasoaldi egin, txingekin (sagardo botilez beteriko bi saski) lau plaza burutu, giza proba bi plaza egin, eta azkenik, udaletxeari bi buelta eman behar izan dizkiote.
Jende andana hurbildu da kirolariak animatzera eta plaza bero-bero jarri da. Baina ez eguraldi eguzkitsuatik soilik, bigarren itzulira arte lehia oso estu joan delako baizik. Ondoren, baina, oiartzuarrek aurrea hartu dute eta ez dute lidergoa askatu nahi izan. Are gehiago, tartea zabaltzen joan dira.
Gaurkoa bi herrien desafioaren lehen atala izan da. Bigarrena, berriz, Lezon izango da bi asteburu barru (ekainaren 10ean), Lezoko Sagardo Egunean. Parte hartzaileek, beraz, denbora izango dute deskantsatzeko, entrenatzeko eta gaur identifikatutako ahulguneak indartzeko. Oiartzuarrek aise irabazi diete lezoarrei. Hortaz, lezoarrak errebantxarako gogotsu izango dira.
Hona hemen goizeko probaren zenbait argazki:
