[Argazki galeria] Musikaz eta dantzaz blai
Beroak ere ez ditu gelditu lezoarrak Mendekoste Jaien bigarren egunean. Erraldoi eta buruhaundiak, Musika Eskolako bandaren kontzertua eta Lezoko Dantzazaleen emanaldiek herria biziki girotu dute.
Mendekoste Jaien bigarren egunean gogotsu irten dira kalera lezoarrak. Lehenik, erraldoi eta buruhaundiek, dultzaineroen laguntzarekin, kaleak musikaz eta kolorez jantzi dituzte. Herrian zehar garrasika, algaraka, korrika eta saltoka aritu dira gaztetxoenak buruhaundiengatik ihesi.
Ondoren, herriko plazan Tomas Garbizu Musika Eskolako bandaren kontzertuaz gozatu ahal izan dute. Itzalaren babesean, gustura entzun dituzte bertaratu direnek musika bandak jo dituen abesti ezagun eta dantzagarriak. Gazteenek, aldiz, ur pistolekin aurkitu dute fresko mantentzeko modua.
Azkenik, bazkaltzera joan aurretik, Lezoko Dantzazaleek emanaldia eskaini dute Gurutze Santuaren plazan, musika bandaren laguntzarekin.
Hona hemen goizeko zenbait argazki:
