Aizpea Otaegi: "Jarraituko dugu dena ematen herri hau guztientzako bizigarriagoa izan dadin"
Pozik azaldu da Aizpea Otaegi emaitzekin, baina kezka ere badu abstentzioak gora egin duelako. Herritarrei babesa eta konfiantza eskertu die.
Honakoa da udalbatza berria. Pozik. Hala azaldu da Aizpea Otaegi Mitxelena EH Bilduk hauteskundeak irabazi eta datorren agintaldian ere Errenteriako alkate izaten jarraituko duela jakin berritan. HITZAri egindako adierazpenetan aitortu du “oso pozgarria” dela hauteskundeak irabazi izana, eta gobernagarritasuna bermatzea: “Bi gauzak dira pozik egotekoak”. Kezka ere azaldu du, baina, koalizio subiranistaren zerrendaburuak eta beste lau urtez Errenteriako alkate izango denak: “Gure herrian abstentzioak gorakada izan du. 2.500 bozka gutxiago izan dira gaur, herritar horiek erabaki dute ez bozkatzea, eta horrek eragin beharko liguke guztioi gogoeta bat”.
Politika publikoak eta munizipalistak “ezinbesteko” jo ditu Otaegik, “bizi kalitatea bermatu eta bizi baldintzak hobetzeko. Kezkatzen gaitu 2.500 ez bozka horien atzean dagoen desafekzio eta urruntze politikoak”.
Aitortu du, halere, abstentzioak ez diola EH Bilduri askorik eragin: “Oso ondo eutsi diogu erronkari. Zentzu horretan babestuta sentitzen gara, babestuta sentitzen dugu gure proiektua, eta lau urte hauetan egindako kudeaketa”.
Esker ona, azkenik, herritarrei: “Babesagatik, konfiantzagatik”. Konpromiso argi bat Otaegirena herriarekiko, herritarrekiko: “Jarraituko dugu dena ematen azken urteetan bezala herri hau hobea izan dadin, guztientzako bizigarriagoa izan dadin”.
Ondoko irudian udalbatza berriaren osaketa ikus daiteke.
Honakoa da udalbatza berria.
