Parte hartzeak behera egin du, bi puntu eta erdian
Botoa ematera deituta dauden 30.507 herritarren artetik, %33,40 joan dira hauteslekuetara eguerdiko ordu biak arte.
Herritarrak botoa ematen Beraunen, Koldo Mitxelena institutuan. Botoa ematera deituta dauden 30.507 herritarren artetik, %33,40 joan dira hauteslekuetara eguerdiko ordu biak arte, 10.195 herritar, zehazki. Oraintxe zabaldu ditu Espainiako Gobernuak parte hartzearen gaineko lehen datu ofizialak. Ordu honetan, 2019an, herritarren %35,93koa izan zen parte hartzea —11.037 herritarrek bozkatu zuten duela lau urte denbora tarte berean—, hortaz, %2,53 jaitsi da parte hartzea lehenengo datu ofizialen arabera.
Parte hartze datuen berri 18:00etan zabalduko dute, bigarrenez.
Amona-bilobak elkarrekin eman dute botoa Galtzarabordako kiroldegian. lehen aldiz eman du botoa gaur gazteak.
Lasaitasuna nagusi izaten jarraitzen du hauteskunde egunean. Bitxikeriak ordea, utzi ditu egunak. Izan ere, asteburuan Alaberga auzoko jaiak ospatzen ari dira, eta danbor hotsekin batera joan dira botoa ematera auzo horretako bizilagunak gaur. Kolore berezia zuen auzoak, ez dago hori ukatzerik, eta jai giro eta kolore hori hauteskunde egunari kutsatu diote.
Eguerdian, goiz partean baino mugimendu gehiago antzeman da hauteslekuetan. Galtzarabordako kiroldegian irudi ederra utzi dute biloba-amonak; hiru belaunaldi bien artean, baina konpromiso bera, bilobak lehen aldiz bozkatu du gaur, eta amonarekin batera joan da botoa ematera hauteslekura.
