Herritarren erabateko babesa jaso du EH Bilduk, laugarrenez
Gau magikoa izango zela gaurkoa iragarri zuen Aizpea Otaegik joan den asteartean Lekuona Fabrikan egindako kanpainako ekitaldi nagusian. Ez zuen hutsik egin; herritarrek erabateko babesa erakutsi diote Otaegi buru duen zerrendari.
Bilgunean garaipena ospatzen. Argazkia: EH Bildu Gau magikoa izango zela gaurkoa iragarri zuen Aizpea Otaegik joan den asteartean Lekuona Fabrikan egindako kanpainako ekitaldi nagusian. Ez zuen hutsik egin; herritarrek erabateko babesa erakutsi diote Otaegi buru duen zerrendari, eta egindako lanarekin ados daudela erakutsi. Bederatzi zinegotzi lortu ditu koalizio subiranistak, 2019ko hauteskundeetan lortutako zinegotzi kopuru bera, eta bozkatu duten errenteriarren % 41,7k babestu du EH Bilduren proiektua. 6.717 boto lortu ditu guztira (2019an, 6.941 boto lortu zituen) aurreko udal hauteskundeetan baino 224 boto gutxiago.
Parte hartzea ia zortzi puntuan jaitsi bada ere 2019ko hauteskundeekin alderatuta, ez du ondoriorik izan EH Bildurentzat praktikoki mantendu duelako boto kopurua. Bigarren indarrak baino 2.195 boto gehiago lortu ditu koalizio subiranistak, eta 2011n hasitako bidea sendotu herritarrek eskainitako babesarekin.
PSE-EE izan da bigarren indarra. Botoen %27,65 lortu du, 4.522 herritarrek bozkatu dute Isaac Palencia buru duen zerrenda. 2019ko hauteskundeetan 5.273 boto lortu zituzten sozialistek; gaurkoetan 751 boto gutxiago jaso dituzte. Itxaropena zuten datuak alde jarriko zituztela, baina ez dute asmatu honako kanpainan ere, zerrendaburu berria bazuten ere. Higatze politika baliatu zuten 2019an EH Bilduren kontra eta ez zuen eraginik izan orduan; lau urte geroago ere, huts egin die euren praktika politikoak emaitzek agerian jarritako moduan.
EAJk ere behera egin du botoetan. 2019an baino 511 boto gutxiago jaso ditu. baina hiru zinegotzi mantenduko ditu.
Elkarrekin Errenteriak izan du galera zinegotzietan; bi zinegotzi izango ditu agintaldia berrian egun duen zinegotzietako bat galduta.
Beste aldaketa, 2015az geroztik zinegotzirik ez zuen alderdi popularraren eskutik heldu da Errenteriako Udalera. Ordezkari bat izango du PPk.
Emaitzak
- EH Bildu: 6.717 (9 zinegotzi) Botoen %41,14
- PSE-EE: 4.522 (6 zinegotzi) botoen %27,68
- EAJ: 2.501 (3 zinegotzi) botoen %15,44
- Elkarrekin Errenteria: 1.407 (2 zinegotzi) %8,65
- PP: 918 (zinegotzi 1) %1,78
