Ia hiru puntutan jaitsi da parte hartzea, 14:00etako datuak oinarri
Lau barrutien artean 4.139 boz jaso dira hautetsontzietan 14:00etako lehen zenbaketarako. Orain dela lau urte 4.537 izan ziren.
Pasaiako hogei mahaietako bat. 
Eman dituzte jada udal eta foru hauteskundeen lehen zenbaketako parte hartze datuak. 14:00etarako, 4.139 pasaitarrek zuten emana boza, 2019an baino 398 gutxiagok (4.537 izan ziren ordu berean duela lau urte). Portzentaietan, herritarren %33,68k bozkatu du aurten eguerdiko ordu bietarako, eta azken hauteskundeetan %36,39k sartua zuten paper-botoa hautetsontzian.
Partaidetzak 2,71 puntu egin du behera aurten, 2019ko datuekin alderatuta. Oraindik, ordea, sei ordu dituzte bizilagunek euren boz eskubidea egikaritzeko, 20:00etan itxiko baitituzte hauteslekuen ateak. Bigarren parte hartze datuak 18:00etan emango dituzte, eta orduko datuekin eguneraketa egingo du HITZAk.
Pentsa liteke goizean goiz irten diren eguzki-izpiak aprobetxatzen izango direla pasaitar asko eta asko, eta beltzarantzeko aukerak apaltzen joan ahala hurbilduko direla gehiago bozkalekuetara. Horrek 2019ko abstentzioa gutxitzea ekar lezake, nahiz eta Pasaian hori lortzea ez den erronka handia, Oarso-Bidasoko abstentzio tasarik altuena izan baitzuen udalerriak orain dela lau urte: %39,7koa.
